«Манчестер Юнайтед» сардори, ҳимоячи Гарри Магуайр шартли равишда 21 ойга озодликдан маҳрум этилди. Бу ҳақда «Eurosport» хабар берди.

Унга оғирлаштирувчи ҳолатга олиб келувчи ҳужум қилиш, ҳибсга олишга қаршилик кўрсатиш ва пора беришга уриниш каби айбловлар қўйилган эди.

Магуайр Грецияда дам олаётганида жанжалга аралашиб қолгани ҳақида хабар бергандик.

Маълум бўлишича, воқеа Миконос оролида юз берган. Магуайр ўзини ҳақорат қилган ватандошлари — британияликлар билан муштлашиб кетган. Ур-тўполонда унинг синглисининг қўлини ўткир буюм билан жароҳатлашган. Бундан жаҳли чиққан  футболчи кучига баттар зўр берган.

Магуайрнинг айтишича, жанжалдан сўнг машина чақиртириб, жабрланганларни касалхонага жўнатишга уринган. Аммо етиб келган машинадан беш-олти киши тушиб, жанжалкашларни полиция маҳкамасига олиб кетишга уринишган. Гарри ва унинг шериклари қаршилик кўрсатишган. Қўлига кишан солинган Магуайр полиция ходимига жароҳат етказишга ҳам улгурган.

У билан жанжаллашган британияликлар кўрсатма беришларича, «МЮ» футболчиси пули кўплигини пеш қилиб, полицияни ўзига оғдиришга уринган.

Ушбу воқеалардан сўнг Англия терма жамоаси бош мураббийи Гарет Саутгейт яқинда Исландия ва Данияга қарши ўтказиладиган ўйинларда Гарри Магуайрни майдонга туширмасликка қарор қилди.

Маълумот учун: Гарри Магуайр 2019 йил августида «Лестер Сити»дан «Манчестер Юнайтед»га ўтганди. Шартнома тафсилотлари очиқланмаган, бироқ трансфер қиймати 87 млн. евродан ошиши маълум қилинганди. Спорт ОАВлари ёзишича, Магуайр футбол тарихидаги энг қиммат ҳимоячига айланган. Солиштириш учун: Виржил ван Дейкни «Ливерпуль» 2018 йилда «Саутгемптон»дан 82 млн. еврога сотиб олган.