Футбол ҳозирги кунда дунё бўйлаб миллиардлаб мухлисларни бирлаштирувчи спорт турига айланди. Аммо бу ўйин қандай бошланган? Қуйида биз дунёдаги энг қадимги ва ҳанузгача мавжуд бўлган 10 футбол клуб ҳақида қисқача маълумот берамиз. Уларнинг ҳар бири футболнинг ривожланиш йўлида муҳим ўрин тутган тарихий жамоалардир.

1. «Sheffield FC» — 1857 ФИФА маълумотига кўра, «Sheffield FC» дунёдаги энг қадимги футбол клубидир. 1857 йилда ташкил этилган бу клуб 2004 йилда ФИФАнинг «Шараф ордени» билан тақдирланган.

2. «Cray Wanderers FC» — 1860 Лондоннинг Бромли туманида темир йўл ишчилари томонидан ташкил этилган. 1895–1907 йиллар орасида қисқа муддат профессионал бўлган, ҳозирда ярим профессионал клуб сифатида фаолият юритади.

3. «Hallam FC» — 1860 Клубнинг илк шакли 1860 йилда пайдо бўлган. 1867 йилда дунёдаги биринчи футбол турнири — «Youdan Cup»да ғолиб чиққан. Улар ўйнаётган «Sandygate» майдони эса дунёдаги энг қадимги футбол майдони ҳисобланади.

4. «Notts County FC» — 1862 Англия Футбол Ассоциациясигача ташкил топган клуб. 1888 йилда Футбол Лигасининг асосчиларидан бири. Аммо юқори лигада катта муваффақиятларга эришмаган.

5. «Stoke City FC» — 1863 Расмий ўйини 1868 йилда бўлиб ўтган. 1925 йилда ҳозирги номини олган. 1972 йилда Лига Кубогини ютган ва 1919 йилдан буён профессионал мақомда.

6. «Wrexham AFC» — 1864 Уэльснинг энг қадимги клуби. «Racecourse Ground»да тўп суради. 2021 йилда актёрлар Райан Рейнольдс ва Роб Макэлхенни клубни сотиб олган.

7. «Brigg Town FC» — 1864 «The Zebras» лақабли клуб қуйи дивизионларда иштирок этади. Улар икки марта лига чемпиони бўлган ва икки марта ФА Ваза кубогини қўлга киритган.

8. «Nottingham Forest» — 1865 Европа миқёсида машҳур клуб. Брайан Клоф даврида Европа Кубоги(ЕЧЛ)ни икки марта ютган (1979, 1980). Шунингдек, жамоа Англия чемпионлиги ва Лига Кубогини қўлга киритган.

9. «Queen's Park FC» — 1867 Шотландиядаги энг қадимги клуб. Англия ФА Кубоги финалига чиққан ягона шотланд жамоаси. Улар 10 марта Шотландия Кубогини ютган.

10. «Sheffield Wednesday» — 1867 «Wednesday Cricket Club»нинг футбол бўлими сифатида ташкил этилган. 1896 йилда илк ФА Кубогини ютган. Англия чемпиони ва бир неча кубоклар соҳиби.