Франция парламентининг қуйи палатаси – Миллий Ассамблея эвтаназия ҳақидаги қонунни қабул қилди. Ушбу ҳужжат оғир ва бедаво дардга чалинган беморларга ихтиёрий равишда ҳаёт билан видолашиш имконини беради.

Қонун лойиҳасини 305 депутат қўллаб-қувватлаган бўлса, 199 нафари қарши чиққан.

Ҳужжат муҳокама учун юқори палата – Сенатга юборилган.

Франция президенти Эммануэль Макрон эвтаназия тўғрисида қонун қабул қилинишини олқишлаган.

Мамлакатдаги католик, православ, протестант, ислом, яҳудий ва будда диний жамоалари етакчилари эса қонун лойиҳасига қарши чиққан.

Қонунга мувофиқ, оғир ва бедаво дардга чалинган беморларнинг талабига кўра, шифокор хулосаси асосида ўз-ўзини ўлдирувчи тиббий воситалар берилиши мумкин. Бу ҳуқуқдан Франциянинг 18 ёшдан юқори фуқаролари фойдалана олади. Руҳий хасталикларга чалинган беморлар бу ҳуқуқдан фойдалана олмайди. 

Дунё бўйлаб саноқли давлатларда беморнинг ихтиёрий равишда ҳаёт билан видолашувига қонунан рухсат берилган. Жумладан, Швейцария, Нидерландия, Бельгия, Люксембург, Канада, Колумбия, Янги Зеландия, Испания, Португалия, Австралия ва АҚШнинг айрим штатларида “ўлим ҳуқуқи”ни қонунан амалга ошириш мумкин.

Бир муддат аввал Австрияда ҳам эвтаназия ҳақидаги қонун кучга кирганди. 

Эвтаназия юнонча “eu” (яхши) ва “thanatos” (ўлим) сўзларидан ясалган бўлиб, “яхши ўлим” деган маънони билдиради. Бу замонавий жамиятнинг энг оғриқли ва баҳсли масалалари сирасига киради. Кўп сонли олимлар эвтаназияни ўз жонига қасд қилиш ўлароқ танқидий баҳолайди ва унга қонуний рухсат берилишини қоралайди.

Самовий динлар, хусусан, исломда ҳам Яратган омонат ўлароқ берган жон неъматига қасд қилиш гуноҳи кабира ҳисобланади.