Давлат хавфсизлик хизматининг Тошкент вилояти бўйича бошқармаси ходимлари томонидан вилоят божхона бошқармаси билан ҳамкорликда ўтказилган тезкор тадбирда нарколаборатория фош этилди. Бу ҳақда ДХХ матбуот хизмати хабар қилди.

Аниқланишича, Юқоричирчиқ туманида 2 нафар фуқаро дала ҳовлида яширин нарколаборатория ташкил этиб, «Мефедрон» синтетик наркотик моддасини тайёрлаб, сотиш билан шуғулланишган.

Дала ҳовлида 1 кг. 12 гр. «Мефедрон» синтетик гиёҳвандлик воситаси, кимёвий суюқликлар ва бошқа зарур ускуналар борлиги аниқланган.

Шунингдек, бу шахсларнинг бирига тегишли «кафе»да 18 гр. «опий», 33 гр. «гашиш», 2 гр. «Мефедрон» наркотик моддалари топилган.

Бу шахслар «Телеграм» орқали мижоз топиб, наркотик моддаларни хуфия жойларга яшириб кетиш орқали сотишган.

Тадбир давомида 15 та хуфия жойга сотиш мақсадида 7 гр. «Мефедрон» ва 8 гр. «гашиш» наркотик моддалари яширилгани аниқланди.

Қонунбузарлар жиноий ҳаракатларига фарғоналик кимёгарни ҳам жалб этишган. Кимёгар элементлардан фойдаланган ҳолда гиёҳвандлик воситасини тайёрлаган.

Наркотикларни хуфия жойларга жойлаштириш билан эса Юқоричирчиқ туманида яшовчи шахс шуғулланган.