Дания энди Европа Иттифоқи «тежамкор тўртлиги»нинг бир қисми эмас. Бу ҳақда мамлакат бош вазири Метте Фредериксен баёнот берди.

Доим Евроиттифоқнинг бюджет харажатлари оширилишига қарши бўлиб келган Дания «тежамкор тўртлик» фаолларидан саналган. Бироқ дунё ўзгаряпти, Дания янги чорловларга, хусусан, Европанинг қайта қуролланишига диққатини қаратмоқда, деди бош вазир.

Евроиттифоқ Украина уруши, миграция, иқлим ўзгаришлари ва бошқа жиддий чорловлар қаршисида турибди. Бу мавҳумлик ва Россия томонидан бўлаётган таҳдидлар шароитида янада мослашувчан, ЕИ истиқболларига мувофиқ янги бюджет керак, дея таъкидлади Фредериксен.

Унинг айтишича, Дания бюджет музокараларида, пулларни кераксиз харажатларга ишлатмаслик учун, ўз позициясини қаттиқ ҳимоя қилади.

Дания қаторида «тежамкор тўртлик»ка кирувчи Австрия, Нидерландия ва Швеция илгари пандемия оқибатида юзага келган иқтисодий инқирозга чора сифатида бюджет харажатлари кескин оширилишига қарши чиққанди.