Футбол бўйича жаҳон чемпионати иштирокчилари ҳақидаги туркум мақолаларни сайтимизда эълон қилишда давом этамиз. Навбат гуруҳ баҳсларидан сўнг тўғридан-тўғри йўлланма олган Осиёнинг сўнгги жамоаси Жанубий Кореяга!

Лақаби: «Осиё йўлбарслари», «Тэжу жангчилари», «қизил иблислар».

Конфедерация: ОФК.

Бош мураббий: Шин Тхэ Ён.

Сардор: Ки Сунг Йонг.

Энг кўп ўйин ўтказган футболчи: Хон Мён Бо (136).

Тўпурар: Ча Бум Кун (59).

Уй стадиони: «Seul world cup stadium».

ФИФА рейтингида: 61 (2018 йил 12 апрель).

Энг юқори ўрин: 17 (1998 йил декабрь).

Энг паст ўрин: 69 (2014 йил ноябрь, декабрь; 2015 йил январь).

Илк ўйин: Гонконг – Жанубий Корея 1:5 (Гонконг, 1948 йил 6 июль).

Энг йирик ғалаба: Жанубий Корея – Непал 16:0 (Инчхон, Жанубий Корея; 2003 йил 29 сентябрь).

Энг йирик мағлубият: Швеция – Жанубий Корея 12:0 (Лондон, Англия; 1948 йил 5 август).

Жаҳон чемпионатидаги иштироки: 9 марта (4-ўрин, 2002 йил).

Осиё кубогидаги иштироки: 13 марта (2 марта чемпион бўлган).

Дастлабки таассурот

Жанубий Корея Осиё футболининг байроқдор терма жамоаси ҳисобланади. «Осиё йўлбарслари» икки марта қитъа чемпиони бўлган. Кореяликлар Осиё чемпионатида барчадан кўпроқ иштирок этган бўлса-да, соврин ютиб олиш бўйича азалий рақиб Япония ва кейинчалик етакчиликка қўшилган Эрон ва Саудия Арабистонидан ортда қолмоқда. Осиёликлар ичида биринчилардан бўлиб жаҳон чемпионати иштирокчисига айланган корейслар 1950 йилги жаҳон чемпионатида Швейцария, Туркия ва Венгрия терма жамоаларига умумий ҳисобда 0:16 ҳисобида ютқазиб, яна 32 йилга дунё биринчилигини тарк этган.

Илк дуранг

Навбатдаги чемпионат бугунги кунга қадар мамлакат терма жамоаси тўпурари ҳисобланиб келаётган Ча Бум Кун номи билан боғлиқ. Мексика майдонларида ҳам тўғри, ҳам мажозий маънодаги қайноқ чемпионатда пайдо бўлган кореяликлар Болгарияга қарши баҳсда ўзлари учун илк очколарни қўлга киритишди. Америка ва Европа майдонларида ўтган кейинги жаҳон чемпионатларида ҳам иштирок этган «Тежу жангчилари» гуруҳ баҳсларидан нарига ўта олишмади.

Хиддинк «мўъжизаси»

Барчасини аввалига Сеул, кейин Сидней кўчаларига, ундан кейин рус чақалоқларига исми қўйилган инсон, мураббий ўзгартириб юборди. Ҳолландиялик Гус Хиддинк омади келса гуруҳ баҳсларидан амал-тақал қилиб чиқа оладиган бутун бошли осиёликлар учун феномен жамоани шакллантирди. Жаҳон чемпионати бошланмасдан олдин ҳеч ким Жанубий Кореянинг учинчи ўрин учун майдонга тушишига ишонмасди. Аммо доимий меҳнатсеварлик, кучли иштиёқ, қатъий тартиб ва айтиш мумкинки шармандали ҳакамлик «Тежу жангчилари»ни финал остонасигача етаклаб борди. Улар сафида тўп сурган футболчиларнинг деярли барчаси кейинчалик Европанинг кучли чемпионатларида ўз омадини синаб кўрди.

Жанубий Корея билан бир гуруҳда Португалия, АҚШ ва Польша каби анчагина кучли жамоалар йиғилган эди. Илк баҳсдаёқ полшаликлар мағлуб этилди – 2:0. АҚШга қарши баҳс ҳам яриморолликлар учун уч очко келтириши мумкин эди. Аммо сўнгги дақиқалардаги пеналти Донован жамоадошларини мағлубиятдан қутқариб қолди. Гуруҳдаги сўнгги ўйинда Руи Кошта ва Луиш Фигу бошчилигидаги португалларни кичик ҳисобда енгган «Осиё йўлбарслари» ўз уйларидаги чемпионатдан умидлари катта эканлигини яширишмади.

«Шармандали ғалабалар»

Шармандали ибораси балки Жанубий Корея учун эмасдир. Чунки амалда кўп ишни Экавадор ва Мисрдан келган ҳакамлар бажаришган. Нимчорак финал баҳси амалдаги Европа чемпионати финалчиси Италияга қарши кечди. Мазкур баҳс мезбонлар учун катта ютуқ сифатида, чемпионат ҳакамлиги учун шармандалик сифатида тарихга кирди. Ноҳақ четлатилган Тотти ва офсайддан урилган Ан Жун Хваннинг голи ва албатта эквадорлик ҳакам Байрон Моренонинг хурмача қилиқлари италияликлар учун қимматга тушди. Чорак финалда Хиддинк шогирдлари яна бир можарога аралашиб қолишди. Дарвозабон Ли Ун Жэни Оливер Кан даражасига кўтарган учрашувда мисрлик ҳакамлар бригадаси ўзини кўрсатди. Испанлардан юлиб олинган ғалаба пеналтилар сериясидаги «Бетис» аъзоси Хоакиннинг хатосигача давом этди. Унгача Испаниянинг учта «тоза» голи ҳисобга олинмади. Корея «сериали»нинг якуний қисмлари немис ва турк «актёр»лари ижросида ажойиб тарзда якунланди. «Йўлбарслар» қанчалик кучли бўлмасин чемпионатда шерлар ҳам бор эди. Шундай бўлса-да, натижа корейс халқи томонидан муваффақият сифатида қабул қилинди ва улар бош мураббий Гус Хиддинкни миллат қаҳрамонлари билан бир қаторга қўйишди.

 Кейинги имкониятлар

Хиддинк «мўъжиза»сидан кейин яна уч марта жаҳон чемпионатига йўлланма олган «Осиё йўлбарслари» уларнинг дастлабкисида бошқа бир ҳолланд мураббийи Дик Адвокат бошчилигида гуруҳдан чиқа олишмади. ЖАР майдонларидаги чемпионатга маҳаллий мураббий Хо Жон Му бошчилигида йўл олган кореяликлар ишончли ўйинлари билан ёдда қолди. Гуруҳ баҳсларида юнонларни мағлуб этиб, Нигерия билан дуранг ўйнаган «йўлбарслар» нимчорак финалда Уругвай билан тенгма-тенг баҳс олиб борди ва 80-дақиқагача дуранг ўйнади. Бразилиядаги сўнгги жаҳон чемпионати бошқа Осиё жамоалари сингари Корея терма жамоаси учун ҳам омадсиз якунланди.

 Асосий юлдуз

Бу борада ҳамма бир хил фикрда бўлса ажаб эмас. «Тоттенҳэм» ўйинчиси Сон Хён Мин шубҳасиз бугунги кун Осиё юлдузи. Уч йилдан буён Осиёнинг энг яхши футболчиси деган номни ҳеч кимга бермай келаётган ҳужумчи Англия премьер лигасининг етакчи клубида асосий таркиб футболчиси ҳисобланади.

КХДРга жуда яқин манзил Чхунчхонда таваллуд топган ҳужумчи ўз ватани клубларининг асосий таркибида деярли тўп сурмаган. Немис скуатлари уни 16 ёшида «Сеул»дан Европага, ёш футболчиларни тайёрлаш бўйича машҳур бўлган «Ҳамбург»га олиб келишган. «Динозаврлар» асосий таркибига тезда мослашиб, илк мавсумдаёқ бундеслигада тўп киритган энг ёш футболчи деган номни қўлга киритган Сонга деярли барча грандлар қизиқиш билдира бошлади. «Бавария» рўйхатига тушган футболчи захирага михланиб қолишдан чўчиб, бошқа бир гранд «Байер»га йўл олди. Леверкузенда ҳам тезда мухлислар ёқимтойига айланган кореялик футболчи бош мураббий Рожер Шмидт томонидан қанот футболчисига айлантирилди.

Кореялик футболчининг кейинги манзили Лондон, мураббийи Маурисио Почетино бўлди. У бугунги кунда Англиянинг энг кучли ҳужумчиларидан бири эканлиги аниқ.

Саралаш баҳслари

Одатда Жанубий Корея терма жамоаси учун саралаш баҳслари қийин кечмайди. Фақат сўнгги иккита жаҳон чемпионати бундан мустасно. Ачинарлиси ҳар иккисида ҳам Ўзбекистон терма жамоаси улар йўлига тўғаноқ бўлди ва олиб ташланди. Ҳар икки сафар ҳам улар Эронни биринчи ўринга ўтказиб юборишди ва ҳар гал нисбатан кучсиз жамоаларга кутилмаган ғалабаларни тақдим этиб, мураббийларига гап эшиттиришди. Сурия ва Эронга тақдим этилган очколарга сабр қилган раҳбарият Қатарга ютқазилганини ҳазм қила олмади ва германиялик бош мураббий Ули Штиликени истеъфога чиқарди. Маҳаллий мураббий Син Тхэ Ён бошчилигида давом эттирилган саралаш баҳслари Тошкентда муваффақиятди якунланди. Голсиз дуранг «Осиё йўлбарслари»ни жаҳон чемпионати финал қисмига олиб чиқди.

Сўнгги бешта ўйин

 Рақиблар

Кореяликлар учун тақвим анчагина қулай. Илк баҳсда тактик жиҳатдан ўзгармас, кўпроқ жисмоний жиҳатга урғу берадиган Швеция билан баҳс чемпионат ҳаяжонини босиш учун яхши имконият беради. Мексикага қарши иккинчи ўйин ҳар икки жамоа учун ҳам ҳал қилувчи аҳамиятга эга бўлиши мумкин. Гуруҳ фаворити Германия билан бўладиган учрашув немислар учун аҳамиятсиз бўлиб қолиши эҳтимолдан холи эмас.

Ўзаро ўйинлар

Немислар ва корейслар жаҳон чемпионатларида икки марта дуч келишган. Илк баҳс 1994 йилги жаҳон чемпионатида бўлиб ўтган ва унда «бундестим» 3:2 ҳисобида ғалаба қозонган. Иккинчи баҳс Кореяни жаҳон чемпионати финалига чиқишдан маҳрум қилган. 2002 йилда Михаэл Баллак Хиддинк шогирдларининг бронза медал олиши учун имконият яратиб берган эди – 1:0. Сўнгги, 2004 йилда бўлиб ўтган ўртоқлик учрашувида Жанубий Корея тарихий ғалабага эришган.

Мексика билан ўйинлар нисбатан кўпроқ. 1998 йили содир бўлган илк учрашув «ацтеклар»нинг ғалабаси билан якунланган – 3:1. 2001 йилги Конфедерациялар кубогида кореяликлар реванш олишган. Бир йил ўтиб КОНКАКАФ олтин кубогида меҳмон сифатида иштирок этган «йўлбарслар» рақибларини чорак финалда тўхтатишган. Жамоалар ўртоқлик учрашувларида ҳам бир неча бор куч синашишган.

Жанубий Кореянинг тарихдаги энг йирик мағлубияти Швеция билан ўйинда қайд этилган. 1948 йилги олимпиада ўтказилаётганда Корея футболи эндигина пайдо бўлган эди. Ўртоқлик учрашувларида корейслар бирор марта ҳам ғалаба қозона олмаган.