Испаниянинг Барселона шаҳар кенгаши 30 май кунги йиғилишида Исроил ҳукумати билан барча расмий муносабатларни узишга қарор қилди. Бу ҳақда маҳаллий «El País» нашри хабар берди.

Маълумотларга кўра, «Comunes» ва Социалистик партия (PSC) тайёрлаган қарорни ERC партияси ҳам қўллаб-қувватлаган. Қарорда қайд этилишича, шаҳар халқаро ҳуқуқ ва инсон ҳуқуқлари таъминланмагунча Исроил ҳукумати билан институционал алоқаларни тўхтатади. Ҳужжатда 1998 йилдан буён амал қилиб келаётган Тель-Авив билан дўстлик ва ҳамкорлик келишуви ҳам бекор қилиниши кўзда тутилган.

Шунингдек, Барселона портига Исроилга қурол олиб кетаётган кемаларни киритмаслик ҳам тавсия этилган. Бундан ташқари, шаҳарнинг ҳар қандай қурол-аслаҳага алоқадор фаолиятдан холи бўлиши лозимлиги таъкидланган.

Қарорда Исроилнинг Ғазо секторидаги аҳолига қарши ҳаракатлари ҳам кескин қораланган, бу ҳаракатлар халқаро ҳуқуққа зид экани қайд этилган. Шу билан бирга, ҳар қандай турдаги антисемитизм ва исломофобияга қарши кураш муҳимлиги алоҳида таъкидланган.

Барселона бу қарор орқали халқаро миқёсда инсон ҳуқуқларини ҳимоя қилиш борасидаги позициясини яна бир бор намоён этмоқда.