АҚШ Россия ва Украина музокараларда хайрихоҳлик кўрсатмаса, урушни тўхтатиш бўйича воситачи ролидан воз кечади. Бу ҳақда АҚШ давлат департаменти расмий вакили Тэмми Брюс 29 апрель куни бўлиб ўтган матбуот анжуманида гапирди.

“Биз ҳозир шундай вазиятда турибмизки, ҳар икки томон ушбу зиддиятни тўхтатиш бўйича аниқ таклифлар тақдим этиши керак. Энди қандай ҳаракат қиламиз – буни президент Трамп ҳал қилади. Агар олдинги силжиш бўлмаса, ушбу жараёнда воситачиликдан воз кечамиз”, – деди Давлат департаменти воизи.

Бир неча кун олдин Россия президенти Владимир Путин 9 май – Ғалаба байрами муносабати билан уч кунлик оташкесим ўрнатилишини маълум қилганди.

Москва Вашингтон ва Киевнинг 30 кунлик ўт очишни тўхтатиш таклифини эса рад этган.

Давлат департаменти расмий вакили Тэмми Брюс Путиннинг ушбу таклифига жавобан Вашингтон уч кунлик эмас, балки доимий оташкесим исташини таъкидлаган.

Аввалроқ президент Доналд Трамп ва давлат котиби Марко Рубио ҳам Россия ва Украина ўзаро келишувга бормаса, АҚШ яқин муддатда тинчлик музокараларини тарк этишини билдирган. Жумладан, Трамп 24 апрель куни  The Atlantic нашри бош муҳарририга берган интервьюсида “Келгуси ҳафтада нималар бўлишини кузатамиз. Сўнгги чизиқлар қолди”, – дея сабр косаси тўлаётганига ишора қилганди.

Давлат котиби Марко Рубио эса 27 апрель куни NBC News каналига берган интервьюсида Россия ва Украина ўртасида сулҳ учун етарли ирода йўқлигини айтиб, ультиматум қўйган эди.

“Келаётган ҳафта жуда муҳим ҳафта бўлади. Ушбу муддат мобайнида биз (тинчлик ўрнатиш жараёнида) қатнашишда давом этамизми ёки эътиборимизни бошқа муаммоларга қаратамизми – шу борада аниқ қарорга келишимиз керак”, – деган Рубио.

Таҳлилчиларга кўра, Оқ уй урушни тўхтатиш борасида кўпроқ Кремлнинг манфаатларига уйғун келадиган таклифларни тайёрлаган. Жумладан, Вашингтон Россия аннексия қилган Қрим ярим оролини де-юре ва рус армияси 2022 йилдан кейин босиб олган Украинанинг тўрт ҳудудини де-факто Москвага тегишли деб тан олмоқчи. АҚШ Россиянинг Украинани НАТОга киритмаслик бўйича талабини ҳам қабул қилган.

Аммо шунда ҳам Россия раҳбарияти Украина армиясини буткул кучсизлантиришни талаб қилган ҳолда сулҳга рози бўлмаётир.

Сайловолди кураш даврида Украина урушини 24 соат ичида тўхтатишга ваъда берган Трампга Путиннинг тинчлик бўйича келишувни пайсалга солаётгани хуш келмаётир.

Айни чоқда, Трамп Украинанинг Қрим ҳамда тўрт ҳудудни Россиядан қайтариб олиш талабларига ҳам қарши чиқмоқда.

DW радиоси Financial Times нашрига таяниб ёзишича, сўнгги икки ой мобайнида Кремль вакиллари ҳамда Путиннинг ўзи билан бир неча марта музокара ўтказган Оқ уй мулозимлари музокаралар боши берк кўчага кириб қолди деб ҳисоблайди.

Қайд этилишича, Трамп маъмурияти сахийларча таклифлар билан ҳам Украинани буткул босиб олишни кўзлаган Путинни сулҳга кўндира олмаётир.