Футбол бўйича Ўзбекистон терма жамоаси мухлисларини янги сюрпризлар кутмоқда. Бу ҳақда федерация президенти Умид Аҳмаджонов «narodnoeslovo.uz»га маълум қилди.

«Айни пайтда бир қатор мутахассислар билан музокара олиб боряпмиз. Аввалроқ терма жамоа бош мураббийлигига номзодлар ҳақида маълум қилгандик. Бироқ ҳозирча аниқ келишувларга эришилганича йўқ», — деди Аҳмаджонов.

Шу ўринда эслатиш ўринлики, ЎФФ бир муддат аввал терма жамоани бошқаришга номзодлар ҳақида хабар берган эди. Рўйхатда Славолюб Муслин, Миодраг Радулович, Анжело Алессио, Бернд Шторк, Бранко Иванкович, Славен Билич, Валтер Маццари ва Берт ван Марвейк каби таниқли мутахассислар номлари келтирилган эди.

Терма жамоанинг янги бош мураббийи ким бўлишини 2018 йилнинг январ ойида эълон қиламиз. Ҳозирча бир нарсани айтишим мумкин: ўзининг олдинги жамоаси билан мундиалга чиқа олган мураббий Ўзбекистон терма жамоаси бошқарувини қўлга олади. Ўйлайманки, бу кўпчиликни хурсанд қилади.

Умид Аҳмаджонов

ЎФФ бугунги кунга қадар Жанубий Корея, Япония каби Осиёнинг етакчи футбол федерациялари билан ҳамкорлик меморандумларини имзолаган. Келажакда худди шундай ҳамкорлик Англия, Германия ва Франция футбол федерациялари билан ҳам йўлга қўйилиши режалаштирилган. Бундан ташқари, УЕФА билан ҳам ҳамкорлик йўлга қўйилмоқда.

Эслатиш жоиз, Ўзбекистон миллий терма жамоаси келаси йилнинг 27 март куни Марокаш миллий терма жамоаси, 18 май куни эса Эрон терма жамоаси билан ҳам ўртоқлик учрашуви ўтказиши борасида келишувга эришилган. Ҳар икки беллашув рақиб терма жамоа майдонида ўтказилади.