Futbol bo‘yicha O‘zbekiston terma jamoasi muxlislarini yangi syurprizlar kutmoqda. Bu haqda federatsiya prezidenti Umid Ahmadjonov «narodnoeslovo.uz»ga ma’lum qildi.

«Ayni paytda bir qator mutaxassislar bilan muzokara olib boryapmiz. Avvalroq terma jamoa bosh murabbiyligiga nomzodlar haqida ma’lum qilgandik. Biroq hozircha aniq kelishuvlarga erishilganicha yo‘q», — dedi Ahmadjonov.

Shu o‘rinda eslatish o‘rinliki, O‘FF bir muddat avval terma jamoani boshqarishga nomzodlar haqida xabar bergan edi. Ro‘yxatda Slavolyub Muslin, Miodrag Radulovich, Anjelo Alessio, Bernd Shtork, Branko Ivankovich, Slaven Bilich, Valter Matssari va Bert van Marveyk kabi taniqli mutaxassislar nomlari keltirilgan edi.

Terma jamoaning yangi bosh murabbiyi kim bo‘lishini 2018 yilning yanvar oyida e’lon qilamiz. Hozircha bir narsani aytishim mumkin: o‘zining oldingi jamoasi bilan mundialga chiqa olgan murabbiy O‘zbekiston terma jamoasi boshqaruvini qo‘lga oladi. O‘ylaymanki, bu ko‘pchilikni xursand qiladi.

Umid Ahmadjonov

O‘FF bugungi kunga qadar Janubiy Koreya, Yaponiya kabi Osiyoning yetakchi futbol federatsiyalari bilan hamkorlik memorandumlarini imzolagan. Kelajakda xuddi shunday hamkorlik Angliya, Germaniya va Fransiya futbol federatsiyalari bilan ham yo‘lga qo‘yilishi rejalashtirilgan. Bundan tashqari, UYeFA bilan ham hamkorlik yo‘lga qo‘yilmoqda.

O‘zbekiston milliy terma jamoasi kelasi yilning 27 mart kuni Marokash milliy terma jamoasi, 18 may kuni esa Eron terma jamoasi bilan ham o‘rtoqlik uchrashuvi o‘tkazishi borasida kelishuvga erishilgan. Har ikki bellashuv raqib terma jamoa maydonida o‘tkaziladi.