Ижтимоий тармоқларда номаълум ҳайдовчи аёл бошқарган автомашинани тепиб, техник шикаст етказганлиги акс этган видео тарқалди. Бу воқеани бир нечта ОАВлар «йигит қиз у билан танишишни истамагани учун унга тажовуз қилди», деб ёзди.

Бироқ йигит тарқалган бу хабарларга ўз муносабатини билдириб, чиқиш қилди. Унинг таъкидлашича, дўстлари билан ўз автомобилида кетаётганида ёнидан «Gentra»да бир қиз ўтиб, уларга қўл ишорасида хунук қилиқ қилган. Шундан сўнг йигит қиз бошқараётган автомобилни қувиб етиб, унинг йўлини тўсиб, қиз билан гаплашиб олмоқчи бўлади.

Лекин қиз автомобиль ойнасини туширмасдан телефони орқали йигитни видеога олишни бошлаган. Бундан жаҳли чиққан йигит қизнинг автомобили ойнасига қўл билан, ён қисмига оёқ билан зарба беради. 

«Мен ҳақимда нотўғри тушунган инсонлар фақат биринчи тарафни эмас, иккинчи тарафни ҳам эшитишни ўрганинглар», – дейди йигит ўз чиқишида.

Тошкент шаҳар ИИББ Матбуот хизмати берган расмий хабарда, йигит ва қиз ўртасида келишмовчилик содир бўлгани ва йигит қизнинг автомобилига шикаст етказгани айтилган.

«Мазкур ҳолат юзасидан Юнусобод тумани ИИО ФМБ томонидан терговга қадар текширув ўтказилмоқда. Натижаси бўйича қонуний қарор қабул қилиниши таъминланади», – дейилади ИИББ хабарида.