Ўзбекистонда яна икки нафар коронавирус юқтирган бемор вафот этди.

Тошкент вилояти Бекобод шаҳрида яшаган 50 ёшли З.Р. (эркак)да жорий йил 8 июль кунидан бошлаб тана ҳарорати кўтарилиб, нафас етишмовчилиги, йўтал билан уйида амбулатор шароитида даволаниб юрган. 16 июль куни эса оғир аҳволда шифохонага ётқизилган.

«COVID-19» инфекцияси тасдиқлангач, реанимация бўлимига ўтказилган. Унга «COVID-19» инфекциясининг ўта оғир кечиши, икки томонлама пневмония ташхиси қўйилган.

Хасталик ўткир респиратор дистресс синдроми, ўткир нафас етишмовчилиги асорати билан кечган.

Бироқ шифокорлар томонидан стандартлар асосида ўтказилган реанимацион муолажаларга қарамасдан беморнинг аҳволи кескин оғирлашиб, ўткир респиратор дистресс синдроми, ўткир нафас етишмовчилигидан вафот этган.

Тошкент шаҳри Шайхонтоҳур туманида яшаган 67 ёшли Т.З. (эркак)да жорий йил 4 июль кунидан ҳолсизлик, тана ҳароратининг кўтарилиши, юрак тез уриши ҳамда кўкрак соҳасида оғриқ қўшилишига қарамай уй шароитида даволанган.

11 июль куни ҳансираш, нафас сиқиши, оёқ-қўл совуши пайдо бўлгандан сўнг Эпидемиология, микробиология ва юқумли касалликлар илмий-текшириш институти клиникасига олиб келиниб, реанимация бўлимига ётқизилган.

Муолажаларга қарамай беморнинг аҳволи кескин оғирлашиб, ўткир респиратор дистресс синдром, ўткир нафас етишмовчилигидан вафот этган.