«Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги ЎРҚ-935-сонли Қонунга асосан «Умра» тадбирларини ташкил этиш ва ўтказиш, алоҳида лицензияланадиган фаолият тури сифатида белгиланиб, Ўзбекистон Республикаси Дин ишлари бўйича қўмитаси мазкур соҳадаги лицензияловчи ваколатли орган этиб тасдиқланган.

Шу сабабли, тадбиркорлик субъектлари томонидан Ўзбекистон Республикаси Дин ишлари бўйича қўмитасидан янги тартиб бўйича қайтадан «Умра» тадбирларини ташкил этиш ва ўтказиш бўйича хизматлар кўрсатишга доир фаолият учун лицензия олган ҳолда фаолият юритиши белгиланди.

Туристик фаолиятни амалга ошириш учун лицензия асосида «Умра» тадбирларини ташкил этиш ва ўтказиш бўйича хизматлар кўрсатиш мумкин эмаслигини эслатиб ўтамиз.

Шунингдек, «Умра» тадбирларини ташкил этиш ва ўтказиш фаолияти билан ноқонуний шуғулланиб келаётган тадбиркорлик субъектлари хизматларидан фойдаланган юртдошларимиз Саудия Арабистони Подшоҳлигида ноқулай ҳолатларга тушиб қолиш ҳолатлари кўплаб кузатилаётганлиги маълум қилинади.

Мазкур ҳолатларни олдини олиш «Умра» амалларини ишончли амалга ошириш мақсадида лицензия олган тадбиркорлик субъектлари хизматларидан фойдаланишингиз тавсия этилади.

Ўзбекистон Республикаси Дин ишлари бўйича қўмитаси томонидан «Умра» тадбирларини ташкил этиш ва ўтказиш бўйича хизматлар кўрсатишга лицензия олган тадбиркорлик субъектлари реестри очиқ маълумот сифатида доимий равишда янгиланиб бориши билдирилади.

Дин ишлари бўйича қўмитасидан лицензия олмасдан «Умра» тадбирларини ташкил этиш ва ўтказиш фаолияти билан ноқонуний шуғулланиш қонунчиликда белгиланган тегишли чоралар кўрилишига асос бўлади.