Ўзбекистон Республикаси Президентининг «Республика иқтисодиётига тўғридан-тўғри хорижий инвестицияларни жалб қилиш механизмларини янада такомиллаштириш чора-тадбирлари тўғрисида» қарорига кўра «Тошкент — Андижон» ва «Тошкент — Самарқанд» пуллик автомобиль йўллари қурилиши белгилаб олинди.

«Тошкент — Андижон» пулли йўли қурилиши бўйича 2019 йилнинг июнь ойида Жаҳон банки билан консультация хизматини кўрсатиш бўйича битим тузиш кўзда тутилган. Қурилиш тендери ғолибини эълон қилиш ва у билан битим тузиш муддати 2020 йилнинг декабрига белгиланди. Йўл қурилиши 2021 йилнинг август ойида бошланиши режалаштирилмоқда.

«Тошкент — Самарқанд» пуллик йўли қурилиши Туркиянинг «Cengiz Enerji Sanayii ve Ticaret A.S», «KaneH» ва «Komm» компаниялари консорсиуми билан амалга оширилади. Автомобиль йўли маршрутини ўрганиш ва дастлабки ҳисоб-китоб ишларини ишлаб чиқиш 2019 йилнинг май ойига белгиланган. Қурилиш жорий йилнинг 4-чорагида бошланиши ва 2021 йилнинг 4-чорагида автомобиль йўли фойдаланишга топширилиши лозим.

Эслатиб ўтамиз, Ўзбекистонда пуллик йўллар пайдо бўлиши ва улар қай тариқа хизмат кўрсатиши ҳақида сайтимизда аввалроқ маълумотлар берилган эди.