Иссиқ ҳавода ширин газланган ичимликлар, қаҳва шунингдек, ҳар қандай спиртли ичимликлардан воз кечиш керак. Бу ҳақда Москва соғлиқни сақлаш департаменти бош мустақил мутахассиси Андрей Тяжелников маълум қилди, дея хабар беради «РИА Новости».

Шифокорнинг сўзларига кўра, ширин ичимликлар таркибидаги шакар чанқоқни қондирмайди ва фақат сувсизланишни оширади. Қаҳва ва аччиқ дамланган чойга келсак, улар диуретик таъсирга эга ва қимматбаҳо минераллар билан бирга танадан суюқликни олиб ташлайди.

Иссиқликда спиртли ичимликларни қатъиян тақиқлаш керак, чунки у юрак ва қон томирларига, бутун танага юкни оширади. Чекишни ташлаш яхшироқдир, чунки иссиқ ҳавода тамакининг токсик таъсири кучаяди.

Тяжелников кўпроқ тоза сув ичишни тавсия қилди.

«Умумий тавсия - кунига камида 2,5 литр ичиш. Чанқоқлик пайдо бўлганда ва буйракларни ортиқча юкламаслик учун ҳар соатда, тахминан 100 миллилитрдан тоза сув ичиш керак», - деб тушунтирди шифокор.

Ичимлик сувига лимон шарбати, ялпиз ва резаворлар қўшишингиз мумкин. Иссиқ ҳавода ўсимлик чойи, шакарсиз мева шарбати, компот ва кам минералланган сув ҳам фойдалидир.