Президентликка номзод Шавкат Мирзиёев айни вақтда Фарғона вилоятида бўлиб турибди. Давлат раҳбари вилоятда соғлиқни сақлаш соҳасида амалга ошириладиган ишларга тўхталди.

Унга кўра:

• 22 та янги оилавий шифокорлик пункти ва 10 та оилавий поликлиника барпо этилади ва замонавий тиббий жиҳозлар билан таъминланади.
• Вилоятда бирламчи бўғинга қўшимча 1,5 мингта штат ажратилади.
• Бирламчи тиббий хизматда дори воситалари ва тиббий буюмлар харид қилиш учун ажратиладиган маблағлар 3 баробарга оширилади. Бунинг учун, бюджетдан ҳар йили камида 50 миллиард сўмдан ажратилади.
• Вилоятнинг 40 ёшдан ошган 1 миллионга яқин аҳолиси ўртасида юрак-қон томир ва диабет касалликлари бўйича манзилли скрининг текширувлари ўтказилади.
• Бунинг учун, «тиббиёт бригадалари» қондаги глюкоза ва холестерин миқдорини ўлчайдиган экспресс-тестлар билан таъминланади.
• Бағдод, Ёзёвон туманлари ва Қўқон шаҳрида туманлараро шикастланишлар ва ўткир қон-томир касалликлари марказлари ташкил этилади.
• Фарғона шаҳрида – 2 та, Қўқон, Марғилон шаҳарлари ҳамда Бешариқ туманида – 1 тадан туманлараро перинатал марказлар ташкил этилади ва барча туғруқ бўлимлари тўлиқ замонавий тиббий жиҳозлар билан таъминланади.
• Қува, Бувайда, Олтиариқ, Фарғона, Ўзбекистон, Қўштепа, Риштон ва Тошлоқ туманлари тиббиёт бирлашмалари лапароскопик ускуналар билан таъминланиб, каминвазив операциялар ўтказиш йўлга қўйилади.
• 120 ўрин жойга эга бўлган Болалар тиббий реабилитация маркази ташкил этилади.
• Вилоятнинг ҳар бир шаҳар ва туман поликлиникаларида болалар бўлимлари фаолияти қайта тикланади, шифохоналарда эса болалар реанимацияси ташкил этилади.
• Фарғонада, водийда ягона Болалар кардио-хирургия маркази ташкил этилиб, туғма юрак нуқсони бор, юқори технологик операцияга муҳтож болаларни замонавий эндоваскуляр йўл билан хирургик даволаш йўлга қўйилади. Барча даволаш амалиётлари бюджет ҳисобидан амалга оширилади.
• Нефрология марказининг филиали ташкил этилади ва буйрак трансплантацияси йўлга қўйилади.
• Гемодиализ ускуналари 2-3 баробарга кўпайтирилади.
• Вилоятда Ҳиндистон билан ҳамкорликда, Эндокринология маркази ташкил этилади.
• Давлат-хусусий шериклик асосида, вилоят кўптармоқли тиббиёт маркази негизида, барча хирургик хизматларни бир жойни ўзида ташкил этувчи замонавий тиббиёт кластери барпо этилади.
• Вилоят тиббиёт тизими учун фақатгина давлат бюджетидан келгуси беш йилда 5 триллион сўм ажратилади.