Украина Қуролли Кучларига мамлакат шарқидаги қарши ҳужумга тайёргарлик кўриш учун бироз вақт керак.

Бу ҳақда Украина президенти Владимир Зеленский Европа ОAВларига берган интервюсида маълум қилди.

Зеленский шунингдек, AҚШдаги навбатдаги президентлик сайловлари олдидан Украинанинг Россия устидан ғалаба қозонишига ишонишини айтди.

«Биз қарши ҳужумни бошлашимиз ва муваффақиятга эришишимиз мумкин. Бироқ, бу йўлда жуда кўп одамларни йўқотамиз. Мен буни номақбул деб биламан. Шунинг учун кутишимиз керак. Ҳали бироз вақт керак. Россия учун катта ва ёқимсиз сюрприз тайёрламоқдамиз», — дея Зеленскийдан иқтибос келтирмоқда BBC.

Владимир Зеленский Украина ҳарбийлари жанговар ҳаракатларга тўлиқ тайёр эканини айтди. Шу билан бирга, унинг сўзларига кўра, уларда «баъзи нарсалар», жумладан, Ғарб зирҳли техникаси етишмайди.

Президент Жо Байден мағлубиятга учраган тақдирда AҚШ қўлловини йўқотиши мумкинлиги ҳақидаги саволга Зеленский сайловгача ғалабага ишонишини айтди. «Ким билади, биз қаерда бўламиз? Ўшангача ғалаба қозонишимизга ишонаман», — деди у.

AҚШдаги президентлик сайловлари 2024 йил 5 ноябрда бўлиб ўтиши режалаштирилган.