ХХР ҳарбий-денгиз флоти бир пайтнинг ўзида Шарқий Хитой, Жанубий Хитой ва Сариқ денгизда машқлар ўтказди. Бу ҳақда бугун, 11 февраль куни «South China Morning Post» хабар берди.

Шарқий Хитой денгизида Шарқий қўмондонликнинг учта эсминеци (душман сувости кемалари, учиш қурилмалари, жумаладан, ракеталар ва кемаларига қарши кўп мақсадли ҳарбий кема), жумладан, янги — 052D тоифасига мансуб кема манёвр ва ҳавога қарши мудофаа кўникмаларини оширган.

Жанубий Хитой денгизида «Weishanhu» таъминот кемаси ва «Youai» госпитал кемаси жанговар шароитда қутқарув-қидирув амалиётлари ва ёнилғи олиш ҳамда ўқ отиш бўйича машқлар ўтказди.

Сариқ денгизда Шимолий қўмондонлик кемалари қутқарув амалиётлари бўйича кенг кўламли машқлар олиб борди.

Нашр бу машқлар АҚШ ва Япония Тайван шарқида ҳамкорликда ўтказган «Noble Fusion 2022» беш кунлик ўқувлардан икки кун сўнг амалга оширилганига эътибор қаратди. Америка-япон ҳарбий машқларида АҚШнинг «Abraham Lincoln» авиаташувчиси, қарийб 15 минг америкалик денгизчи ва денгиз пиёдаси, Япониянинг минг нафар ҳарбий хизматчиси қатнашганди.