Тожикистоннинг Хатлон вилоятида «Россияда жазо муддатини ўтаётган, бироқ кутилмаганда Украинада бўлиб қолган ва урушда ҳалок бўлган» икки муҳожир дафн этилди.

2021 йил сентябрида Бобоазиз Тўйдиев Россияда гиёҳванд моддаларни сақлашда айбланиб қўлга олинган ва олти йиллик қамоқ жазосига ҳукм қилинган эди. Унинг отаси Тохир Тўйдиевнинг айтишича, шу йилнинг 23 сентябрь куни ўғли телефон орқали «уларни урушга жўнатишаётганини», айтган.

«Мен уларни жўнатиш мумкин эмас дедим, лекин Бобоазиз бошқа иложи йўқлигини айтди. У урушга боришга мажбурлангандек туюлди», дейди у.

22 ёшли Бобоазиз Тўйдиевнинг жасади 12 декабрь куни Россиядан Тожикистонга олиб келинган ва ўзи туғилиб ўсган Ёвон туманига дафн этилган. Марҳумнинг жасадини олиб кетишга борган амакиси Камолхўжа Ғоибов унинг жасадини уйга олиб келишда «Россия расмийлари ҳеч қандай ёрдам бермади» дейди. Унинг сўзларига кўра, «қўлига ҳеч қачон қурол тутмаган» тажрибасиз йигит урушга жўнатилган.

«У бошининг орқа қисмидан яраланган, бошининг деярли ярми йўқ бўлиб кетган. Урушда қатнашганларга  моддий ёрдам ваъда қилган Россия ҳукумати бизга бир тийин ҳам бермади. Жасадни олиб келиш учун муҳожирлар ёрдамида пул йиғдик», – дея қўшимча қилди у.

28 ёшли Манучеҳр Шодов Кушониён ҳудудида дафн этилган.

«Урушга олиб кетилганини биздан яширишди. Ҳозир ҳеч нарса дея олмайман, шикоятим ҳам йўқ, ўғлим ўлдирилган», – дейди унинг отаси. Ҳалок бўлган тожикистонлик йигитнинг дўстларига кўра, Манучеҳр Санкт-Петербургдаги қамоқхонада жазони ўтаётган бўлган.