Америка президенти Доналд Трамп Канада, Мексика ва Хитойдан импорт қилинадиган товарларга божлар жорий этиш ҳақидаги фармонни имзолади.

Шанба куни Трамп иқтисодий фавқулодда ҳолат эълон қилди ва Хитойдан барча импортларга 10 фоиз ва Мексика ва Канададан импортга 25 фоиз тарифларни жорий қилди. Шу билан бирга, Канададан импорт қилинадиган энергетика маҳсулотлари, жумладан, нефт, табиий газ ва электр энергиясига 10 фоиз ставкада солиқ солинади.

Республикачи президент ижтимоий тармоқларда янги тарифлар «америкаликларни ҳимоя қилиш учун» зарурлигини таъкидлаган ва мазкур уч давлатдан ноқонуний фентанил (наркотик модда) ишлаб чиқариш ва экспортини тўхтатиш учун кўпроқ ҳаракат қилишни ҳамда Канада ва Мексикадан АҚШга ноқонуний иммиграцияни камайтиришни талаб қилди.

Ушбу чора-тадбирлар Американинг икки йирик савдо ҳамкори Мексика ва Канада билан иқтисодий қарама-қаршиликни келтириб чиқарди, узоқ йиллик савдо алоқаларини йўқотди ва бу икки давлатни қаттиқ жавоб чораларини кўришга ундади.

Мексика президенти зудлик билан жавоб тарифларини жорий этишни буюрди ва Канада бош вазири мамлакат АҚШ импортига 155 миллиард долларгача бўлган 25 фоизлик божни жорий этишини айтди. Хитой Трампнинг ҳаракатларига ҳозирча жавоб бермади.

Канада Бош вазири Жастин Трюдо АҚШнинг 30 миллиард долларлик алкогол ва меваларига Канада тарифлари сешанба куни АҚШнинг янги тарифлари билан бирга кучга киришини айтди.

«Бу сиз, Америка халқи учун ҳақиқий оқибатларга олиб келади», – деди Трюдо ва бу озиқ-овқат ҳамда бошқа товарлар нархининг ошишига олиб келишини таъкидлади.

У, шунингдек, Оқ уй томонидан амалга оширилган ҳаракатлар бирлаштириш ўрнига канадалик ва америкаликларни иккига бўлганини айтади.