Россия ва Украина делегациялари ўртасидаги музокаралар Истанбулда бошланар экан, Туркия ташқи ишлар вазири Хакан Фидан томонларни тинчлик сари чақирди. У ўз чиқишида музокараларнинг қайта бошланганини муҳим тарихий имконият сифатида баҳолади.

«Истанбулга хуш келибсизлар!» – деб сўз бошлаган вазир, Украина ва Россиянинг тинчлик музокараларига тайёр эканини олқишлади.

«Бугун бу ерда тўпланиб, тинчлик сари интилиш орқали қандай имкониятлар эшиги очилиши мумкинлигини кўрмоқдамиз. Президент Путин ва президент Зеленскийнинг тинчлик ҳақидаги чақириқларини муҳим деб биламиз. Томонларнинг бевосита музокараларга тайёрлиги янги имкониятларни яратди», – деди у.

Фиданга кўра, вазият олдида икки йўл турибди – тинчликка олиб борувчи йўл ва янада кўпроқ вайронагарчиликка сабаб бўлиши мумкин бўлган йўл. Қайси йўлни танлаш эса тарафларнинг ўзига боғлиқ.

«Жаноб президентимиз [Эрдўғон] урушни тугатиш учун доимий ҳаракатлар олиб боряпти. Биз Россия делегациясини Истанбулда қарши олишдан мамнунмиз. Иккала тарафни ҳам қабул қилаётганимиздан хурсандмиз», – дея қўшимча қилди у.

Туркия ТИВ раҳбари сўзларига кўра, бу 2022 йил март ойидан буён Россия ва Украина ўртасида ўтаётган илк учрашув ҳисобланади. У ҳар бир кечиккан кун янада оғир оқибатларга олиб келишини таъкидлади.

– Уруш давом этаётган бир вақтда оловни тўхтатиш зарур. Бу учрашув келгусидаги етакчилар даражасидаги музокараларга замин яратади, – деди у.

Хакан Фидан Туркиянинг тинчлик жараёнида фаол қатнашишини ва ҳар доим тинчлик тарафдори бўлиб қолишини билдириб, нутқини якунлади:

«Биз бу музокаралар орқали тинчликка эришиш мумкинлигига ишонамиз. Туркия ҳар доим тинчлик жараёнида сизнинг ёнгинагизда бўлади. Истанбулга яна бир бор хуш келибсизлар!».