Исроил собиқ бош вазири Нафтали Беннет YouTube платформасида эълон қилинган 5 соатлик интервьюда Россия президенти Владимир Путин билан 2022 йилда бўлиб ўтган музокара тафсилотларини очиқлади.

Ўтган йилнинг 5 март куни Исроил бош вазири Москвада президент Путин билан учрашган ва 3 соат давомида суҳбатлашган. Бу Кремль хўжайинининг Украинага босқинчилик уруш бошлаганидан кейин илк хориж давлат раҳбари билан учрашуви эди.

Беннетнинг ҳикоя қилишича, у Путинга «(Украина президенти Владимир) Зеленскийни ўлдирмоқчимисиз?» деган савол билан юзланган. Путин Зеленскийни ўлдирмаслигини айтган. Исроил ҳукумати раҳбари Путиндан бу борада ваъда беришини сўраган. Мезбон тасдиқ мазмунида жавоб қайтарган.

Учрашувда Россия раҳбари Украинани қуролсизлантиришни тўхтатишга розилик берган, Зеленский эса бунга жавобан мамлакатнинг НАТО аъзо бўлиши режасини кўриб чиқиши лозим эди.

2022 йил апрель ойида Россия ҳарбийлари Украинанинг Буча шаҳрида тинч аҳоли вакилларини ўлдиргани маълум бўлди. Европа Иттифоқи ҳодисани ваҳшийлик деб атаган.

Нафтали Беннетнинг сўзларига кўра, айнан Бучадаги қирғиндан кейин Москва ва Киев ўртасидаги музокаралар ўз маъносини йўқотди.

Путиннинг Зеленский ҳаётига қасд қилмаслик ҳақидаги ваъдасига Украина ташқи ишлар вазири Дмитрий Кулеба муносабат билдирди.

«Ўтмишда Путин Қримни босиб олмаслик, Минск келишувларини бузмаслик, Украинага ҳамла қилмасликка сўз берган. Аммо бу ишларнинг барига қўл урди. Лақма бўлманглар: у устаси фаранг ёлғончи. У ҳар гал бирор ишни қилмасликка ваъда берган бўлса, аслида уни амалга оширишни кўзлаган», – деб ёзди Украина бош дипломати Twitter саҳифасида.

Украина Россияни президент Зеленскийни жисмонан маҳв этишга уринишларда айблаб келади. Хусусан, 2022 йилнинг март ойида Украина президенти девони маслаҳатчиси Михаил Подоляк Зеленскийга қарши 10 дан зиёд суиқасднинг олди олингани ҳақида хабар берган.