Франциянинг Сен-Лоран-сюр-Севр шаҳрида Оливье Мэр исмли кекса руҳоний ўлдирилди. Полициячиларга қотилни топиш машаққат туғдирмади, чунки жиноятчи ўз оёғи билан жандармерияга келиб, қилмишини бўйнига олди. Бу шахс руандалик 40 ёшли қочқин Эмманюэль Абаисенга бўлиб чиқди.

Ҳуқуқ посбонлари гумондорни руҳий касалликлар шифохонасига жойлаштирган. Хабарларга кўра, Э.Абаисенганинг руҳий ҳолати уни қамоқда сақлашга изн бермайди.

Католик динига эътиқод қилувчи қочқин ўтган йили ҳам жиноятга қўл урган: Нант шаҳридаги ибодатхонага ўт қўйган. 2020 йил 18 июль куни рўй берган ёнғин оқибатида готик услубдаги обида жиддий талафот кўрган. Маълум бўлишича, руандалик қочқин бир неча йил давомида Нант ибодатхонасида дастёрлик қилиб келган. Унинг Францияда яшаб қолиш ҳақидаги аризаси узил-кесил рад этилгач, ғазаб устида ибодатхонага ўт қўйган. Қочқин мақомидаги Э.Абаисенга миграция идорасига ўзини қатлиом (геноцид) қурбони деб таништириб ёлғон маълумот тақдим этган. Аслида эса Руанда полициясида фаолият юритган бу шахс фаровон ҳаёт истаб Европага келган.

Ибодатхонага ўт қўйиш айби билан бир муддат қамоқда ўтиргач, у мамлакатни тарк этмаслик ва ўз вақтида тергов идораларига учраш шарти билан, тилхат асосида озодликка чиқарилган. У дастлабки жинояти учун 10 йилгача қамалиши мумкин эди. Бу орада яна бир мудҳиш жиноятни содир этган.

Хорижлик фуқаронинг кетма-кет икки жиноятга қўл ургани, ҳуқуқ идоралари қотилликнинг олдини ола билмагани Франция жамоатчилиги ҳамда мухолифатнинг норозилигига сабаб бўлмоқда. Хусусан, ҳукуматнинг миграция сиёсатига қарши бўлган «Миллий фронт» партияси етакчиси Марин Ле Пен вазиятдан фойдаланиб, яна бир карра Макрон маъмуриятининг қочқинларга доир дастурини танқид қилди.

«Францияда ноқонуний юрган шахс Нант ибодатхонасига ўт қўйса-да, бадарға қилинмади. Мана оқибат: у руҳонийни ҳам ўлдирди.  Мамлакатимизда рўй бераётган воқеалар фавқулодда хатарлидир ва бу ҳукумат ҳамда Жеральд Дарманен (Ички ишлар вазири назарда тутилмоқда – таҳр.) янглиш йўлда эканининг исботидир», – деб ёзди миллатчилик руҳидаги чиқишлари билан танилган Марин Ле Пен. 

Сўл кайфиятдаги «Енгилмас Франция» партияси раҳбари Жан-Люк Меланшон ҳам бу ҳолни номақбул деб атади.

«Ибодатхонага ўт қўйган жиноятчи нега кузатувга олинмади? Ахир, унинг руҳияти беқарор экани маълум эди-ку!»  – деди у.

Воқеа жойига борган мамлакат ички ишлар вазири Жеральд Дарманен жамоатчиликнинг эътирозларига жавобан руандалик шахс тергов бераётгани сабаб уни мамлакатдан бадарға қилиш имконсиз бўлганини маълум қилди.