Жаҳон соғлиқни сақлаш ташкилоти COVID-19нинг келиб чиқиши бўйича терговни қайта бошлаш учун 20 олимдан иборат янги ишчи гуруҳини тузди. Бу ҳақда Wall Street Journalга асосланиб ТАСС агентлиги маълум қилди.

Янги тузилган олимлар гуруҳига лаборатория хавфсизлиги, биологик хавфсизлик, генетика ва ҳайвонлар касалликлари соҳасидаги мутахассислар киради. Тадқиқотлар Хитой ва бошқа бир қанча мамлакатларда олиб борилади.

Патогенларнинг келиб чиқиши бўйича илмий маслаҳат гуруҳи доимий равишда ишлайди. Улар касалликларнинг тарқалишини текширади ва инсонларнинг янги касалликларнинг пайдо бўлишига олиб келиши мумкин бўлган хавфли ҳаракатларини аниқлайди.

Олдинги олимлар гуруҳи COVID-19 вужудга келган деб ҳисобланган Ухан шаҳрига ташриф буюриб, хитойлик тадқиқотчиларга қон таҳлилларини ўтказиш ва касалликнинг дастлабки ҳолатларини текширишни тавсия қилишганди. Хитой томони олиб борилган текширувлар ҳақида ҳисобот бермади ва ЖССТнинг дастлабки ишчи гуруҳи тарқатиб юборилди.

Жо Байден маъмуриятининг расмийлари, жумладан АҚШ Давлат котиби Энтони Блинкен, терговни қайта бошлашга қатъий туриб олди. Энди олимлар коронавирусни текшириш учун янги қон наъмуналарини топишлари керак бўлади. Чунки коронавирусдан илк вафот этганлардан олинган қон таҳлиллари ҳозирги вақтга келиб яроқсиз ҳолга келиб қолган.

Шунингдек, бир неча ой давомида Хитой ҳукумати ЖССТ бош директори Тедрос Адҳан Гебреесусдан нафақат Хитой, балки, Италия ва АҚШ ҳудудида ҳам тергов ўтказишни талаб қилган.