Исроил Суриядаги «энг муҳим ҳарбий объектлар»га бир қатор ҳаво ҳужумларини амалга оширганини билдирди. 

AFP мухбирларининг хабар беришича, сешанба куни эрталаб Дамашқда кучли портлашлар эшитилган. Агентлик суратларида Сурия пойтахти марказидан тутун кўтарилаётган устунлар акс этган.

Британияда жойлашган Сурия Инсон ҳуқуқлари обсерваторияси сешанба куни эрталабдан бери 100 дан ортиқ зарба берилганини хабар қилди.

Жами, ташкилот маълумотларига кўра, сўнгги икки кун ичида Исроил ағдарилган Башар Асад режимининг ҳарбий салоҳиятини йўқ қилиш мақсадида Сурия ҳудудига 250 га яқин ҳаво ҳужумини амалга оширган.

Исроил мудофаа кучлари бу хабарларга изоҳ бермади; у шунингдек, Исроил қуруқликдаги бўлинмаларининг буфер зонадан Сурияга олдинга силжиши ҳақидаги маълумотларни ҳам рад этди. 

Лекин кейинчалик Исроил мудофаа вазири Сурия флотига ҳужум қилинганини тасдиқлади. 

«Исроил флоти кеча тунда Сурия флотини йўқ қилиш операциясини катта муваффақият билан амалга оширди», — дея вазир Исраэл Кац сўзларидан иқтибос келтирган AFP. 

Очиқ манбаларга кўра, Сурия флоти асосан ракета ва патрул катерлари ва мина қўриқлаш кемаларидан иборат эди. Бундан ташқари, ҳарбий-денгиз кучлари таркибида иккита фрегат бор эди. Уларнинг барчаси йўқ қилинганми ёки йўқми ҳозирча аниқ эмас.