ҲАМАС ўт очишни тўхтатиш бўйича келишувни амалга оширишни давом эттиришга рози бўлганини ва келишувда кўрсатилган муддатга кўра Исроилда сақланаётган фаластинлик маҳбуслар эвазига Ғазода гаровга олинганларни озод қилишни давом эттиришини эълон қилди.

«Биз имзоланган ҳужжатга мувофиқ келишувни амалга оширишда давом этишимизни, шу жумладан белгиланган жадвалга мувофиқ маҳбусларни алмашишни тасдиқлаймиз», – дейилади Қатар ОАВси ҲАМАС ҳаракатидан келтираётган иқтибосда . 

Шунингдек, «Ғазодаги ўт очишни тўхтатиш бўйича инқирозни ҳал қилиш ҳақида сўз борар экан, ҲАМАС келишувнинг барбод бўлишидан манфаатдор эмаслигини ва воситачилар уни тўлиқ амалга ошириш учун босим ўтказаётганини» айтган.

ҲАМАСнинг ушбу баёноти ҳаракатнинг юқори расмий вакили Халил ал-Ҳайя бошчилигидаги делегация воситачилар билан музокаралар ўтказиш учун Қоҳирага келганидан бир кун ўтиб янграган.

ҲАМАСнинг айтишича, Миср ва Қатар воситачилари Ғазо секторига инсонпарварлик ёрдамининг давом этишига тўсқинлик қилувчи тўсиқларни олиб ташлашга ваъда берган.

«Al Jazeera»нинг ёзишича, воситачилар келишувнинг гуманитар бандларини амалга оширишга содиқлигини тасдиқлаган. Нашр, мазкур хабарга Ғазога киришни кутаётган кўчма уйлар ва бошқа оғир техникалар ортилган юк машиналари тасвирларини илова қилган.

Эслатиб ўтамиз, душанба куни ҲАМАС шанба куни режалаштирилган гаровга олинганларни озод этишни кечиктириш билан таҳдид қилиб, Исроилни инсонпарварлик ёрдами анклавга етиб боришига тўсқинлик қилаётганликда айблаган эди.