Oddiy call-markaz operatoridan strategik rejalashtirish va tijorat tahlili xizmati rahbarigacha — Abdulaziz Mansurov bu yo‘lni Beeline Uzbekistan’da bor-yo‘g‘i o‘n yil ichida bosib o‘tdi. Kompaniyaning 15 yilligini nishonlashda u oltin mukofotga sazovor bo‘ldi — o‘zi tabassum bilan aytganidek, Beeline’ga bo‘lgan muhabbati uchun. Aslida esa — ajoyib tijorat natijalari uchun.

Dunyodagi eng baxtli odam

Abdulaziz abonent bilan ilk telefon suhbatining barcha tafsilotlarini eslaydi. Balansni tekshirish haqidagi juda oddiy savolga javob berish kerak edi, lekin odatga ko‘ra, yosh call-markaz xodimining ovozi titrab ketgan. «Ammo bu ishni amalga oshirganimni tushunganimda, dunyoda mendan baxtli odam yo‘q edi!» – deydi u.

Bu voqeadan bir necha hafta oldin u qiyin tanlovga duch kelgan edi. Bakalavriatdan so‘ng Abdulaziz o‘qishni davom ettirishni rejalashtirgan, uyali aloqa kompaniyasiga ishga kirish haqida hech qanday fikr ham yo‘q edi. Lekin aynan Toshkent politexnika universitetiga magistraturaga hujjat topshirgan kuniyoq operatoridan SMS keladi. Bu Beeline aloqa markaziga ishlash taklifi bilan jo‘natmasi edi. Universitetdan hali ham aniqlik yo‘q edi va Abdulaziz Mansurov rezyumesini yuborishga qaror qildi. «O‘sha kuni menga qo‘ng‘iroq qilishdi va suhbatga taklif qilishdi. Lekin suhbatni imtihon kuni tayinlashdi, rostini aytsam, kela olmasligimni ogohlantirdim. Qaytib qo‘ng‘iroq qilishmaydi, deb o‘yladim. Biroq, menga osongina boshqa sanani belgilashdi. Suhbat yaxshi o‘tdi. Va men ham imtihondan o‘tdim. Men yana oraliqda qolgan edim, lekin kompaniya yana menga imkoniyat yaratdi — men ishni universitetda o‘qish bilan birlashtira oldim. Ertalab o‘qidim, tushdan keyin qo‘ng‘iroqlarga javob berdim», — deydi Abdulaziz.

Esda qolarli birinchi qo‘ng‘iroqdan oldin ikki haftalik mashg‘ulotlar bo‘lgan. «Ishga qabul qilinganlar»ga abonentlar bilan qanday muloqot qilish, o‘zini to‘g‘ri tanishtirish va turli masalalarni hal etish yo‘llari tushuntirildi. Mijozlar bilan ishlash uchun maxsus tizimlarni o‘zlashtirish, kompaniyaning ichki jarayonlarini o‘rganish kerak edi. «Bu men uchun boshqa dunyo edi. Bungacha uyali aloqa operatorlari qanday ishlashini bilmasdim. Menga hammasi yoqdi. Men bilimlarni juda tez o‘zlashtira boshladim. Men hamon yozuvlarim biriktirilgan daftarlarimni saqlab qo‘yganman», — deb eslaydi Abdulaziz Mansurov call-markazdagi o‘qishini.

Kimga omad kulib boqadi

Abdulaziz bir yarim yilga yaqin call-markazida «oddiy mutaxassis» bo‘lib ishlagan. Bu juda kerakli tajriba orttirishga yordam berdi, chunki boshida hamma narsa o‘rgatilmaydi — faqat amaliyot abonentlarga nima deyish va qanday muomala qilish haqida haqiqiy tushuncha beradi. Va keyin unga menejment bilimlarini (magistraturada Abdulaziz aynan shuni o‘qigan) boshqa guruhda qo‘llashni taklif qilishdi. Endi esa katta maslahatchi sifatida. Natija – bir necha oy ichida ushbu guruh call-markazning ichki reytingida oltinchi o‘rindan ikkinchi o‘ringa ko‘tarildi.

Buning uddasidan qanday chiqildi? «Yechimi oddiy edi: har bir xodimga qanday qilib to‘g‘ri ishlash kerakligini va eng muhimi, nima uchun shunday qilish kerakligini alohida tushuntirish kerak, — deydi u. — Men har doim taniqli odamlarning muvaffaqiyat hikoyalaridan ilhomlanganman. Albatta, har kimning o‘z yo‘li bor, lekin siz ongli ravishda muvaffaqiyatga intishingiz kerak. Qattiq mehnat qiling — va omad sizga albatta kulib boqadi! Ayna shuni biz tushuntirishga harakat qilganmiz. Aytgancha, mening butun tarjimai holim bu haqiqat ekanligini isbotlaydi».

Bu rostdan ham haqiqat: Abdulaziz olti oy katta maslahatchi bo‘lib ishladi. Va keyin tijorat direksiyasidan telefon qo‘ng‘irog‘i bo‘ldi. Istiqbolli yosh mutaxassisga o‘zini tahliliy sohada sinab ko‘rish taklif qilindi. «Raqamlarni juda yaxshi ko‘raman, shuning uchun qiziq bo‘ldi, — deb tan oladi Abdulaziz Mansurov. — Aynan shu payt magistraturani tugatayotgan, dissertatsiya yozayotgandim. Va tez orada u tijorat hisoboti bo‘yicha katta mutaxassis sifatida ishlashi mumkin edi, endi ishini o‘qish bilan birlashtirishning hojati yo‘q edi».

Mijozga yaqinroq!

«Barcha qiladigan ishimni mehr bilan qilaman. Kichik ishmi, kata ishmi, farqi yo‘q», – deydi qahramonimiz. Ishga bunday munosabat shunday ajoyib natijalarni bermasligi mumkin emas edi. Abdulaziz Mansurov Beeline Uzbekistan’ning marketing bo‘yicha direktori lavozimini egallagan davr bo‘lganini eslashning o‘zi kifoya. Ushbu muhim lavozimga tayinlanganida u ... 28 yoshda edi! Uning e’tirof etishicha, o‘sha paytda ota-onasi bundan juda g‘ururlangani uni juda ham ilhomlantirgan - ularning qo‘llab-quvvatlashi tufayli u ajoyib natijalarga erishgan.

Yosh top-menejerning bevosita ishtiroki bilan kompaniya abonentlar bazasining qisqarishini to‘xtatib, uni yana ko‘paytirishga kirishdi.

«Hech kimga sir emaski, ikki yil davomida bizning dinamikamiz yaxshi bo‘lmagan, – deydi Abdulaziz Mansurov. — Bunga ko‘plab turli omillar sabab bo‘lgan, ulardan biri biz mijozlardan ko‘ra ko‘proq daromadga e’tibor qaratganimiz edi. Yangi lavozimimda men barchaga mijoz biz uchun hamma narsadan ustun ekanligini tushuntirishga harakat qildim. Oxirgi bir yarim yil davomida esa ana shu mafkura tufayli ijobiy natijalarga erishdik».

Yangi «parvoz»ga Beeline brendi haqidagi tasavvurni tubdan o‘zgartirgan yirik kampaniyalar yordam berdi. ZO‘R tarif liniyasining qayta ishga tushirilishi shular jumlasidandir. Kompaniya o‘n yil oldin shunga o‘xshash nomga ega bo‘lgan muvaffaqiyatli tariflarga ega edi va savdo bo‘yicha mutaxassislar «ildizlarga qaytishga» qaror qilishdi. Ular o‘zbek estradasining mashhur xonandasi Jahongir Poziljonovni (bir vaqtlar ZO‘R-ZO‘R reklamasi uchun suratga olingan) reklama roligida ishtirok etishga taklif qilishdi, yangi mahsulot va uning afzalliklari haqida ijodiy videorolik qilishdi. Suratga olish ishlari Istanbulda bo‘lib o‘tdi.

«Yangi video va mahsulot tufayli biz yoshlar o‘rtasida brend tushunchasini yaxshilashga muvaffaq bo‘ldik. ZO‘R ishga tushirilganda Beeline mamlakat uyali aloqa operatorlari orasida uchinchi o‘rinda edi. Ikki chorakda yana yetakchilikni qo‘lga kirita oldik», — deydi Abdulaziz Mansurov.

Yoshlar orasidagi muvaffaqiyat ilhomlantirdi: aynan shu yoshdagi abonentlarga qaragan holda, Beeline Uzbekistan o‘tgan yili internet-paketlarni yangiladi. Eng mashhur yosh tiktokerlardan biri Ozod Xuramov reklama kampaniyasi ishtirokchisiga aylandi. Shunday qilib, TikTok ZO‘R-Dance tanlovini ishga tushirdi. Natija – deyarli 35 million ko‘rish, o‘sha paytda O‘zbekiston uchun rekord.

Drayvda

Abdulaziz Mansurovning eng sevimli so‘zlaridan biri bu «drayv». Sevimli ish haqiqatan ham kuchli his-tuyg‘ularni hadya qiladi. Masalan, o‘tgan yilning mart oyida shunday bo‘lgan edi: Navro‘z oldidan Beeline bir necha soat ichida 4G internet-paketlarini ishga tushirgan edi. Va ularning ulanishi sotuvchilarning umidlarini ikki baravar oshirdi.

«Men g‘alabaning yorqin ta’mini eslayman! Bu o‘zimizga, yigitlarimizga ishonchni yanada mustahkamladi, — deydi Abdulaziz. — Bizda ajoyib jamoa, drayv muhiti bor. Har kuni ertalab uyg‘onib, tabassum bilan hozir ishga boraman, deb o‘ylash juda zo‘r. Bu yoqimli his menga kuch bag‘ishlaydi. Agar menga boshqa joyda ishlashni taklif qilishsa, men albatta yo‘q deb aytaman. Beeline mening qonimda, buni o‘zgartirib bo‘lmaydi».

Albatta, Abdulaziz Mansurovning fikru-hayoli nafaqat tijorat tahlili va strategik rejalashtirishga bag‘ishlangan. U hamkasblari bilan tennis va futbol o‘ynaydi. Do‘stlar bilan haftada bir marta — «har qaysi haqiqiy o‘zbek yigiti kabi» — choyxonada uchrashishni unutmaydi. Abdulazizning ikki farzandi bor, o‘g‘li uch yoshda, qizi ikki yoshda, shuning uchun u oilasiga maksimal darajada e’tibor berishga, ish va shaxsiy hayot o‘rtasidagi muvozanatni saqlashga harakat qiladi. «To‘g‘ri, ayolimning so‘zlariga ko‘ra, men buni unchalik uddalamayman», — dedi u jilmayib.

Yaqinda unda yangi sevimli mashg‘ulot paydo bo‘ldi — pazandalik. Do‘stlari bilan tog‘ga chiqqanida yoki dam olish kunlarida oilasi bilan u doimo ovqat pishiradi. So‘nggi olti oy ichida u pasta va risotto tayyorlab, italyancha taomlarga qiziqib qolgan. Ishda bo‘lgani kabi, u hamma narsani chin yurakdan qiladi, shuning uchun uning ovqatlari juda mazali bo‘lib chiqadi.

Hayotga bo‘lgan bunday munosabat o‘z-o‘zidan ajoyib «layfxak»dir. Ammo Abdulaziz Mansurov muvaffaqiyatning boshqa reseptlari bilan ham bo‘lishishi mumkin. «O‘n yoki yigirma yilga emas, balki besh yilga maqsadlar qo‘ying — ulug‘vor, ammo aniq va erishish mumkin bo‘lganlarini, — deydi u. – Tijorat direksiyasiga ilk bor kelganimda, mendan keyingi besh yildagi maqsadlarim qanday, deb so‘rashgan edi. «Boshliq bo‘lish!» dedim. Va to‘rt yildan so‘ng men buni ustidan chiqdim. Keng miqyosda orzu qiling, bor kuchingiz bilan ishlang! Bu mening eng yaxshi maslahatim, chunki mening o‘zim ham shunday qilaman».