«Uff.uz» sayti rahbari Azizxon Akbarov shu kunlarda Rossiyada jahon chempionati bahslarini yoritib bormoqda.

A.Akbarov chempionatga kelgan taniqli futbolchi, «Manchester Yunayted» afsonasi Rayan Giggz bilan suhbatlashishga muvaffaq bo‘lgan. U suhbat davomida O‘zbekiston milliy terma jamoasini boshqarish haqidagi savolga ham javob qaytardi.

Jurnalistning «Janob Giggz, vaqtingizni olmayman, oxirgi savolim. O‘zbekiston futboli haqida eshitmagan bo‘lsangiz kerak-a? Agar sizbop maosh taklif qilishsa, bizning yurtda ishlarmidingiz?», — degan savoliga u quyidagicha javob qaytardi:

— Bir juda to‘g‘ri aytilgan ibora bor: hech qachon «hech qachon» dema. Mamlakatingiz futboli haqida ko‘p narsa bilmayman. Yurtingizda ishlashga kelsak: siz murabbiy sifatida deyapsiz-da?

— Ha, milliy termamiz bosh murabbiyi bo‘larmidingiz?

— O‘ylashimcha, O‘zbekistonda ishlashimgacha qo‘yishmasa kerak. Buyuk Britaniyaning o‘zida o‘nlab takliflar olganman va olayapman. Balki, kelajakda Osiyo futbolida ishlarman. Jumladan, sizning yurtingizda ham. Faqat buning uchun juda ko‘p narsalar bir-biriga mos kelishi kerak. Demoqchimanki, bu yerda gap pulda emas. Sharoit, munosabat, ishga bilmasdan turib aralashaverish va hokazo ko‘p jihatlar bor.