Kilian Mbappe JCh-2022dan qaytganidan so‘ng PSJ bilan mashg‘ulotlarni boshlab yuborgan.

24-dekabr kungi mashg‘ulotda birdaniga ikkita Mbappe bor edi: uning ukasi Etan Kilian bilan birga shug‘ullandi. Bu ularning «PSJ»da birgalikdagi ilk mashg‘uloti.

Kichik Mbappe haqida nimalar ma’lum?

Etan PSJdagi debyut o‘yinidayoq gol urgan.

29-dekabr kuni Etan Mbappe 16 yoshga to‘ladi: u 2017-yilda PSJga, Kilian bilan birga 12 yoshgacha bo‘lganlar jamoasiga qo‘shilgandi. PSJga qadar Etan akasi bilan tug‘ilib o‘sgan Parij chekkasidagi Bondi akademiyasida o‘ynagan. U yangi klubidagi ilk golini debyut uchrashuvidayoq urgandi.

Etan — chapaqay markaziy yarim himoyachi, u hujumda ham o‘ynay oladi. 14 yoshidan u yuqori saviyani namoyish etmoqda. Shu sabab u 17 yoshgacha bo‘lgan jamoaga o‘tkazilgan. 2021-yilda esa PSJ u bilan 2024-yilgacha mo‘ljallangan 3 yillik shartnomani imzoladi. Kichik Mbappe tez o‘smoqda: o‘tgan yili u Fransiyaning 16 yoshgacha bo‘lgan terma jamoasiga ham chaqiruv oldi.

«PSJ» murabbiylari Etanning ko‘p qirraliligi va o‘yinni yaxshi o‘qiy olishini e’tirof etishadi.