Joriy yil 18 may kuni Hukumatning «Tamaki mahsulotlari uchun texnik reglamentni tasdiqlash to‘g‘risida»gi 290-son qarori bilan sigaretalar uchun 2025 yildan kuchga kiradigan texnik reglament tasdiqlandi.

Texnik reglament:

• eksport qilishga yoki respublika hududi orqali tranzit uchun mo‘ljallangan;
• yuridik shaxslar tomonidan ko‘rgazmali namunalar, sinovlar uchun namunalar sifatida sotish maqsadisiz olib kirilgan;
• jismoniy shaxslar, jumladan, chet el fuqarolari tomonidan o‘z ehtiyojlari uchun foydalanish va keyinchalik sotish maqsadisiz olib kirilgan tamaki mahsulotlari va tamakini hamda nikotinni iste’mol qilish moslamalariga nisbatan qo‘llanilmaydi.

Shuningdek:

• xomashyo va ingrediyentlar;
• tashish va saqlash;
• ishlab chiqarish;
• qadoqlash;
• tibbiy ogohlantirishlarga talablarni belgilaydi.

Hujjat tamaki mahsulotlari uchun kimyoviy va mikrobiologik moddalar miqdorining yo‘l qo‘yiladigan eng yuqori darajalarini belgilaydi.

Bundan tashqari, tamaki mahsulotlarining o‘ramida joylashtiriladigan tibbiy ogohlantirishlar namunalari tasdiqlanmoqda.