Hijriy sana bilan har yili Rabi’ul avval oyida O‘zbekiston bo‘ylab Payg‘ambarimiz Muhammad alayhissalomning siyratlariga oid asarlar tanlovi o‘tkaziladi.

Bu haqda bugun, chorshanba kuni O‘zbekiston Musulmonlari idorasi (O‘MI)da bo‘lib o‘tgan tadbirda Muftiy Nuriddin domla hazratlari ma’lum qildi.

– Har yili shu oyda respublika bo‘yicha Payg‘ambarimiz Nabiy alayhissalomning hayotlari haqida asarlar musobaqasini tashkil qilsak, maqsadga muvofiq bo‘lar edi. Mayli u she’riy bo‘lsin yoki nasriy bo‘lsin. Buni o‘rganib chiqish uchun katta bir Hay’at tuzsak va g‘olibni O‘zbekiston Musulmonlari idorasi rahbarlik fondi hisobidan rag‘batlantirsak. G‘olibga Haj ziyorati uchun yo‘llanma tashkil qilamiz. Bu tanlovda nafaqat diniy soha odamlari, balki barcha ishtirok etishini ta’minlaymiz.

Albatta, avval tanlovning shartlari va tartiblarini ishlab chiqamiz, – deydi Muftiy hazratlari.

Ta’kidlanishicha, mazkur mavzu, o‘z navbatida, mualliflarga katta mas’uliyat yuklaydi va tanlovga taqim etiladigan materiallarning qiymati uning tarixiy haqiqatlarga mosligi, diniy nuqtai nazardan ham belgilangan tartib qoidalarga rioya etilganligi bilan o‘lchanadi.