2018-yilning 22-mayida Toshkent shahridagi Inha universitetida O‘zbekiston Respublikasi Axborot texnologiyalari va kommunikatsiyalarini rivojlantirish vazirligining #MITCROADMAP2018 anjumani bo‘lib o‘tadi.

O‘zbekiston Respublikasi Prezidentining «Axborot texnologiyalari va kommunikatsiyalari sohasini yanada takomillashtirish chora-tadbirlari to‘g‘risida»gi Farmoni asosida, 2018-2019-yillarda axborot texnologiyalari va kommunikatsiyalari tizimini tubdan takomillashtirish bo‘yicha «Yo‘l xaritasi» tasdiqlangan.

Shu munosabat bilan, #MITCROADMAP2018 anjumanida AKT sohasi, AT-ta’lim rivojining tendensiyalari, davlat va biznes hamkorligidagi muammolar muhokama qilinadi.

Anjumanda AKT vaziri Azim Axmedxadjayev, «O‘zbektelekom» AK Farhod Ro‘ziyev, Inha universiteti rektori Sarvar Boboxo‘jayev, «Mirzo Ulugbek Innovation Center» direktori Farhod Ibragimov va boshqalar ma’ruza qilishadi hamda ishtirokchilar savollariga javob qaytarishadi.

Anjumanning o‘tkazilish vaqti: 22-may, soat 09:00dan 13:00gacha. Tadbirga ro‘yxatga olish 17-mayga qadar davom etadi.

AKT vazirligi rasmiy saytida ushbu anjumanga bag‘ishlangan maxsus sahifa tashkil etilib, u orqali istalgan kishi vazirga yoki boshqa spikerlarga savol yo‘llash imkoni yaratildi. Savollarga javoblar #MITCROADMAP2018 anjumanida yangraydi.