Turkiya prezidenti Rajab Toyyib Erdo‘g‘on musulmon davlatlarni Isroilning bosqin, terror va ekspansiya siyosatiga qarshi turish uchun bir yoqadan bosh chiqarib harakat qilishga undadi. Bu haqda u diniy ta’lim muassasalarining Imom Xatib nomli qurultoyida gapirgan.

«Avval ham aytganimdek, Isroil G‘azoda to‘xtamaydi. Agar Isroil shu sur’atda davom etsa, Ramallohni (Falastin prezidenti Mahmud Abbos qarorgohi joylashgan shahar, G‘arbiy Sohil – tahr.) bosib olganidan keyin nigohini  boshqa hududlarga qaratadi... Livan va Suriyaga qadar keladi. U o‘z nigohini Furot va Dajla o‘rtasidagi tuproqlarimizga ham qaratadi. (Isroil rasmiylari) ochiq-oshkora suratini namoyish etayotgan xaritalar shundan dalolat beradi», – degan Turkiya rahbari.

Erdo‘g‘on 2023 yil 7 oktyabrdan buyon G‘azoda davom etayotgan urush mobaynida Isroil harbiylari 40 ming nafar begunoh falastinlik, jumladan, 17 ming bolani o‘ldirganini keskin qoralagan. Shunga ko‘ra, u Tel-Avivning terror siyosatiga qarshi turish axloqiy va insoniy burch ekanini urg‘ulagan.

«Barcha musulmon mamlakatlar qachon tugashi noma’lum bo‘lib qolayotgan Isroil istilosiga qarshi mushtarak pozitsiyani egallashi kerak. Biz avval-boshdanoq shunday chorlov bilan chiqqan edik. Biz Isroil zo‘ravonligi, Isroil bosqini va Isroil davlat terrorini to‘xtatishning yagona chorasi musulmon davlatlar ittifoqi deb bilamiz», – degan siyosatchi.

Turkiya yetakchisi kuchayib borayotgan bosqin siyosatiga qarshi Misr va Suriya bilan birdamlikni kuchaytirish yo‘lida amaliy qadamlar tashlanayotganini aytgan.