Gidrometeorologiya xizmati dam olish kunlari O‘zbekistonda kutilayotgan ob-havo ma’lumotini e’lon qildi. 

So‘nggi kunlarda mamlakatimiz hududi bo‘yicha iyul oyining boshi uchun me’yoriy qiymatlardan 4-6° ga yuqori bo‘lgan anomal issiq ob-havo kuzatilmmoqda. Bu hodisa Eron hududlaridan quruq va issiq havo oqimlarining kirib kelishi bilan bog‘liqdir.

Bugun respublikamizning ko‘pchilik viloyatlarida quruq va kam bulutli ob-havo kuzatiladi, faqat Andijon, Namangan, Farg‘ona viloyatlarida kunning ikkinchi yarmida, Toshkent viloyatida kechga tomon qisqa muddatli yomg‘ir yog‘ishi, momaqaldiroq bo‘lishi ehtimoli bor. Ba’zi joylarda shamolning tezligi 15-20 m/s gacha kuchayishi mumkin.

Dam olish kunlarida esa yurtimizda issiq va quruq ob-havo sharoiti saqlanib qoladi, havo harorati kechalari 24-27°, kunduz kunlari 38-41°, shimolda, janubda va cho‘l hududlarda ba’zi joylarda 44° gacha atrofida bo‘ladi. Shamolning 15-20 m/s tezlikkacha kuchayishi saqlanib qoladi.

Respublikamizning ayrim tog‘li hududlarida konvektiv bulutlilik rivojlanishi oqibatida kunning ikkinchi yarmida momaqaldiroq bilan qisqa muddatli yomg‘ir yog‘ishi ehtimoli bor.