Indoneziyaning Janubiy Sulavesi provinsiyasida kuchli yomg‘ir keltirib chiqargan suv toshqinlari natijasida 24 kishi halok bo‘ldi, 69 kishi bedarak ketgan, deya xabar berdi «Sinxua» agentligi.

Avvalroq 15 kishi tabiiy ofat qurboni bo‘lgani ma’lum qilingandi.

«Biz yo‘qolgan odamlarni izlashni davom ettiryapmiz. Ma’lumotlarga ko‘ra, 69 kishi bedarak ketgan, 24 kishining jasadi topildi», — dedi tabiiy ofatlar asoratlarini bartaraf etish boshqarmasi boshlig‘i Muslim Muxtor.

Avvalroq suv toshqini oqibatida yuzlab uylarni sel oqizib ketgani xabar berilgandi. Hukumatning ma’lumotlariga ko‘ra, taxminan 2 ming kishidan iborat mahalliy aholi vaqtincha turar joylarga ko‘chib o‘tishga majbur bo‘lgan. Inda okrugi rahbari Putri Indrianining so‘zlariga ko‘ra, ayrim tog‘li hududlarga faqat ikki g‘ildirakli transport vositasida yetib borish mumkinligi vaziyatni murakkablashtirmoqda, u yerdagi ko‘priklar vayron bo‘lgan. Qutqaruvchilar tabiiy ofatdan zarar yetgan hududlarga yetib borishning boshqa yo‘llarini topishga urinishmoqda.