Andijonda bojxona posti boshlig‘i hibsga olindi. Bu haqda «O‘zbekiston 24» telekanalining bojxona sohasidagi islohotlarga bag‘ishlangan lavhasida ma’lum qilingan. 

Ma’lum bo‘lishicha, shu yilning 3-mart kuni Andijondagi «Do‘stlik» postida yuk mashinasi to‘xtatiladi va unda 5780  dollarlik yuk borligi aytiladi. 

Postda tovarlarni tekshirish iloji bo‘lmagani sababli yuklar Andijon Tashqi iqtisodiy faoliyat postiga yo‘naltiriladi. U yerda yuklar «qizil» yo‘lakka yo‘naltiriladi. 

Lekin oradan biroz vaqt o‘tgach yuklar qo‘yib yuboriladi. Lekin bu hammasi tugadi degani emasdi. Maxsus guruh ishtirokida yuklar Andijon shahrida to‘xtatiladi va mashina yukxonasida naq 5 mlrd 565 million so‘mlik tovarlar borligi ma’lum bo‘ladi. Agar bu yuklar qonuniy yo‘l bilan import qilinganda, davlat budjetiga 1 mlrd 944 mln. so‘m bojxona to‘lovlari to‘langan bo‘lardi. 

2022-yil 19-mart kuni Bojxona qo‘mitasida korrupsiyaga qarshi kurashish yuzasidan bo‘lib o‘tgan yig‘ilishda Andijon Tashqi iqtisodiy faoliyat posti boshlig‘i va uning ikki xodimi shu yerning o‘zida hibsga olindi.