Ukraina elchixonasi rus ashulachisi Grigoriy Lepsning Toshkentda o‘tgan konserti yuzasidan O‘zbekistonning vakolatli organlariga tegishli murojaat yuborgan.

Bu haqda Ukrainaning O‘zbekistondagi elchixonasi ma’lum qildi.

«Elchixona urushni qo‘llab-quvvatlovchi rossiyalik san’atkorlarning O‘zbekistondagi chiqishlari ularning O‘zbekiston obro‘siga tahdid soladigan urushni qo‘zg‘atishga qaratilgan jinoiy faoliyatini qo‘llab-quvvatlashning soxta ko‘rinishini yaratishi mumkinligiga e’tibor qaratadi.

Bundan tashqari, rossiyalik ijrochilar tomonidan olingan mablag‘lar ular tomonidan urush, terrorizm va Ukraina xalqining genotsidini moliyalashtirish uchun ishlatilishi mumkin», – deyiladi diplomatik munosabatda.

Elchixona, щz navbatida, urushni qo‘llab-quvvatlovchi rossiyalik san’atkorlarning chiqishlari uchun O‘zbekistonning konsert maydonlaridan foydalanishga qarshi chiqqani uchun o‘zbek jamoatchiligiga o‘z minnatdorchiligini bildirgan.

Eslatib o‘tamiz, Rossiyaning Ukrainadagi urushini ochiqdan-ochiq qo‘llab quvvatlovchi xonandalarning O‘zbekistonda rejalashtirilgan konsertiga qarshi o‘zbek jamoatchiligi noroziligi va uni bekor qilish talablari ortidan joriy yil 3 iyul kuni Kun.uz nashri ushbu konsert borasida Madaniyat va turizm vaziri o‘rinbosari B.Ahmedovga yuzlangan va undan «O‘zbekistonda san’at uchun hech qanday to‘siq yo‘qligi» mazmunidagi javobni olgan edi.