Bugun, 16-mart kuni «Unicon.uz» binosida «Hilol-nashr» matbaa-nashriyoti bilan hamkorlikda kitob yarmarkasi o‘tkazildi. Maqsad – «Unicon.uz» xodimlarining kitobxonlik madaniyatini yuksaltirish, nutq madaniyatini o‘stirish va mutolaani targ‘ib qilishdir.
Yarmarkada «Hilol-nashr» matbaa-nashriyotining so‘nggi besh yilda nashr qilingan kitoblari xodimlar uchun chegirmali narxlarda sotildi. E’tiborlisi, «Unicon.uz» xodimlari tomonidan diniy, ilmiy-ommabop, tarbiyaviy va bolalar uchun mo‘ljallangan kitoblar katta qiziqish bilan xarid qilindi.
– Kitob yarmarkasini o‘tkazish korxonamizda odat tusiga kirib boryapti, – deydi «Unicon.uz» xodimi Habiba Rasulova. – Joriy yilning 22-28-fevral kunlari «Sharq ziyokori» nashriyoti va kitob markazi vakillari bilan ham kitob yarmarkasi tashkil etilgan edi. Korxonamizda kitob o‘qimaydigan xodimning o‘zi yo‘q. Nashriyot xodimlarining qo‘li-qo‘li tegmayotganidan ham buni bilish mumkin. Yarmarkadagi narxlar ham chegirmali. Xodimlar faqat o‘zi uchun emas, oila a’zolari, bolalar uchun ham adabiyotlar xarid qilishmoqda.