Taniqli turk aktyori Burak O‘zchivit XIV Toshkent xalqaro kinofestivalida mehmon sifatida ishtirok etadi. Bu haqda Kinematografiya agentligi Axborot xizmati xabar berdi.

U Turkiya delegatsiyasi tarkibida Toshkentga tashrif buyuradi va boshqa turk aktyorlari bilan birga kinofestivalning asosiy tadbirlarida ishtirok etadi. Joriy yilning 15-sentyabr kuni Forumlar saroyida tantanali ravishda ochiladigan «Turk kinosi kunlari» shular jumlasidandir.

Turkiya delegatsiyasi Toshkentda bir qator filmlar namoyishini o‘tkazib, 16-sentyabr kuni Urganch shahriga jo‘nab ketadi va u yerda ham 2 kun davomida o‘z filmlarini namoyish etadi.

Kinematografiya agentligi direktori Firdavs Abduxalikovga ko‘ra, turk seriallaridagi aktyorlarning kinofestivalga tashrifi Toshkent shahar hokimligining ko‘magi bilan amalga oshirilmoqda.

Eslatib o‘tamiz, Burak O‘zchivit  2019-yili ham Toshkentga kelgan va u bilan 2,5 soatlik kechki ovqat marosimida o‘tirish va birga tanovul qilish uchun o‘zbekistonliklar qariyb 377 ming AQSh dollari to‘lagan edilar.