Samarqand shahar prokurori Dilmurod Sayidqulov boshqa ishga o‘tganligi munosabati bilan ayni paytgacha Samarqand shahri hokimi vazifasida faoliyat yuritgan Boburmirzo Oblaqulov Samarqand shahar prokurori vazifasiga tayinlandi. Bu haqda Samarqand shahar hokimligi axborot xizmati xabar berdi.

Kecha, 17-fevral kuni Boburmirzo Oblaqulov o‘z arizasiga binoan Samarqand shahar hokimi lavozimidan ozod etilgandi. Ayni paytda ushbu lavozimda Fazliddin Umarov faoliyat yuritmoqda.

Eslatib o‘tamiz, 2019-yilning 25-may kuni Xalq deputatlari Samarqand shahar kengashining navbatdan tashqari sessiyasida tashkiliy masala ko‘rilgan, Samarqand shahar prokurori vazifasida ishlab kelgan Oblaqulov Boburmirzo Salomovich Samarqand shahar hokimi vazifasini bajaruvchi lavozimiga tasdiqlangandi.

Boburmirzo Oblaqulov 1972-yil Kattaqo‘rg‘on tumanida tug‘ilgan. Samarqand shahar prokurorligi va hokimligidan oldin O‘zbekiston Respublikasi Bosh prokuraturasi, Samarqand viloyat prokuraturasida faoliyat ko‘rsatgan, Pastdarg‘om, Oqdaryo tumanlarida prokuror lavozimida ishlagan.