«Ijtimoiy fikr» respublika jamoatchilik fikrini o‘rganish markazi tomonidan «O‘zbekiston fuqarolari atom elektr stansiyasini qurish haqida» mavzusida tadqiqot o‘tkazdi. O‘zbekiston Respublikasi Energetika vazirligi matbuot xizmati xabar bermoqda.

Qayd etilishicha, turli soha va tarmoqlarda faoliyat ko‘rsatayotgan turli ijtimoiy guruhlarning vakillari o‘rtasida o‘tkazilgan mazkur tadqiqot natijalari shuni ko‘rsatdiki, respondentlarning yarmidan ko‘pi (69,5%) atom energiyasi haqida yetarlicha ma’lumotga ega. Shu bilan birga, respondentlar energetikaga bo‘lgan ehtiyojlarni qondirish va gaz kabi tabiiy  resurslarni tejashda tinch atomni qo‘llash muhimligini ta’kidlagan. 

Shuningdek, unda AES qurish g‘oyasiga ehtimoliy salbiy munosabatda bo‘lish sabablari ham tahlil qilingan.  Odatda bu borada yadro energiyasining atrof-muhitga ko‘rsatadigan zararli ta’siri haqida fikr yuritiladi. Ushbu masalada respondentlarning qariyb 30 foizi bunday  faktlar haqida yetarli ma’lumotga ega emasligini ta’kidlagan bo‘lsa, 20 foizga yaqini esa bu borada o‘z nuqtai nazariga ega ekanligini tasdiqlagan. 

So‘rovda ularning aksariyati zamonaviy atom elektr stansiyalari elektr energiyasi bilan ishonchli tarzda ta’minlash barobarida tabiatga zarar yetkazmasligini bildirgan. 

«Yana bir muhim jihat, mamlakatimiz fuqarolari O‘zbekistonda uran qazib olinishidan xabardorligi, bu esa AESning barqaror ishlashi uchun muhim ekanligini ma’lum qilgan. Shunday qilib, so‘rov natijasidan mamlakatimiz fuqarolari birinchi atom elektr stansiyasini qurish bo‘yicha qarorni qo‘llab-quvvatlashi ma’lum bo‘ldi. Ahamiyatlisi shundaki, respondentlarning 83 foizi «Men O‘zbekistonda quriladigan birinchi AES bilan faxrlanaman» va 85,6 foizi «Men AES faoliyatini qo‘llab-quvvatlayman» degan fikrga qo‘shilgan. Har ikkinchi respondent (55,7%) inshoot qurilishida yoki AESning o‘zida ishlashga xohishi bor ekan. Bu istak, ayniqsa, yoshlar tomonidan ko‘proq (71,6%) bildirilgan», deyiladi vazirlik axborotida.

Izoh: Yuqorida keltirilgan «Ijtimoiy fikr» tadqiqoti natijalarida negadir faqat foizlar keltirilgan. So‘rovda necha kishi ishtirok etgani ma’lum qilinmagan.