Joriy yilning 12-sentyabr kuni ijtimoiy tarmoqlarda Qashqadaryo viloyatining Koson tumanida Qarshi-Maroqand temir yo‘l yo‘nalishida qatnovchi «Afrosiyob» yuqori tezyurar elektropoyezdi 2,5 yoshli bolani bosib ketgani haqida xabarlar tarqalgan edi.

Rasmiy ma’lumotlarda 2022-yil 9-sentyabr kuni sodir bo‘lgani aytilgan mazkur voqea tafsilotlari ma’lum qilindi.

Unda aytilishicha, voqea kuni o‘sha kuni soat 15:30 larda sodir bo‘lgan. Bola poyezd urib ketishidan 15 daqiqa avval ham tarbiyachining oldida bo‘lgan.

Ma’lum qilinishicha, bolakayning mahalliy DXSh asosidagi Oilaviy nodavlat maktabgacha ta’lim muassasasiga keltirilganiga 2 kungina bo‘lgan.

Bolakayning buvisi nabirasidan xabar olish maqsadida o‘sha kuni soat 12:00 larda bog‘cha tarbiyachisiga qo‘ng‘iroq qilgan va tarbiyachi unga bolaning yonida ekanini, o‘zini yaxshi his qilayotganini aytgan.

– Qizim farzandini olib kelganida, mayli qolsin, o‘zimning bolamday qarayman, deb olib qolgan. O‘sha kuni soat 12:00 larda ham telefon qilgan, bolam injiqlik qilmayaptimi, deb. Tarbiyachi soat 15:15larda ham oldimda edi, deyapti. Soat 15:30da esa bu voqea sodir bo‘lgan. 15 daqiqaning ichda 2,5 yashar bola voqea joyiga qanday yetib borganiga hayronmiz, – deydi bolaning buvisi Mahbuba Sharipova.

Tarbiyachi esa o‘z ko‘rsatmasida bolaning derazadan oshib, 5 daqiqa ichida yo‘qolib qolganini va uni qidirganini aytgan.

Hozirda mazkur holat yuzasidan tergovga qadar surishtiruv ishlari olib borilmoqda. Shuningdek, mazkur oilaviy bolalar bog‘chasining ayni paytda faoliyati to‘xtatilgani aytilmoqda.