Савдолар якунига кўра, криптовалюта қиймати 59 минг доллардан ошди — янги тарихий рекорд. Бу ҳақда «Корреспондент» хабар берди.

Криптовалюталарнинг энг йирик биржаси — «Binance»да биткоин қиймати Тошкент вақти билан соат 15:16 ҳолатига 5,81 фоизга ошиб, 59 374 долларга етди.

20дан зиёд биржалардаги ўртача нархларни қайд этиб борувчи «CoinMarketCap» порталига кўра, биткоин соат 15:26 (Т.В.) ҳолатига 5,01 фоизга қимматлаб, 59 454 долларни ташкил этган.

Ҳар икки динамика суткабай келтирилган.

Январь охиридан бери криптовалюта қиймати тўрт ҳафта тинмай ошди. Январь охирида биткоин 32 минг доллар эди, февралда салкам икки бараварга қимматлади.

Бироқ февраль охирида, 58 352 долларлик янги тарихий рекорд қайд этилганидан сўнг, биткоин қиймати кескин пасайишни бошлади. 22 февралда — 50 минг доллар, 26 февралда 44,5 минг долларга (суткасига қадрсизланиши деярли 12 фоиздан) тушиб кетди.

Мавзуга оид: ДХХ ва Департамент Тошкентда биткоин сотган шахсларни ушлади

Кейин биткоин яна ўсишни бошлади ва бир неча кун илгари $56 минглик чўққисига кўтарилди.

Эслатиб ўтамиз, биткоин капиталлашуви яна $1 трлн.дан ошди. 2021 йил бошидан бери ушбу криптовалюта қиймати қарийб 90 фоизга ошди.