Япония ҳукумати япон тили ҳамда Кунчиқар ўлка анъаналари, маданиятини ўрганишга қизиқувчи ўзбекистонлик ёшларнинг билим олиш ташаббусини қўллаб-қувватлашда давом этади. Бу ҳақда Япониянинг Ўзбекистондаги фавқулодда ва мухтор элчиси Такаши Ҳатори Тошкентда ташкил этилган “Японияда таълим ва карьера: касбий фаолиятни ривожлантириш имкониятлари” мавзусидаги анжуманда гапирди.

Япония элчихонаси томонидан Япония ОТМ битирувчилари клуби (UJUAC) билан ҳамкорликда ташкил этилган тадбирда нутқ сўзлаган дипломат ўзбекистонлик талабаларни фаол ўқиш ва муваффақиятли карьера қуришга ундади.

Анжуманда Япония университетларини битириб муваффақиятга эришган мутахассислар ўз тажрибаси билан ўртоқлашди.

Маълумот ўрнида, Япония анъанавий равишда Ўзбекистонга таълим грантлари тақдим этиб келади.

Жумладан, Кунчиқар ўлка ҳукумати дастури доирасида 2024 йилда Ўзбекистоннинг 18 нафар ёш давлат хизматчиси магистратура ва 1 нафар ёш давлат хизматчиси докторантура босқичида таълим олган.

20 йилдан ортиқ вақт мобайнида молиялаштирилаётган лойиҳа доирасида 400 га яқин Ўзбекистон вазирлик ва идоралари вакиллари Кунчиқар ўлканинг нуфузли университетларида таҳсил олган. Улар магистрлик ва докторлик даражаси билан ватанга қайтиб, халқ хўжалигининг турли тармоқларида фаолият юритмоқда.

Аввал хабар берганимиздек, Япония элчиси Такаши Ҳатори ўзбекистонлик талабаларнинг япон тилини билиш салоҳиятига юқори баҳо берганди.