«Opta»нинг хабарига кўра, куни кеча, 7 февраль куни «Барселона» футбол бўйича Испания Ла Лигасининг 22-турида «Бетис»га сафар қилди.

Учрашувнинг 38-дақиқасида Борха Иглесиас каталонияликлар дарвозасини ишғол қилиб, мезбонларни олдинга олиб чиқди.

«Барселона» сардори Лионель Месси 57-дақиқада майдонга тушиб, орадан икки дақиқа ўтар-ўтмас ҳисобни тенглаштиришга муваффақ бўлди. Шундан сўнг «Бетис» жамоаси тинимсиз ҳужумлар остида қолди.

Месси нафақат ўйинни ўзгартириб юборди, балки кейинги рекордга ҳам яқинлашиб олди. Ўйиннинг 59-дақиқасида киритилган голи захирадан майдонга тушиб уришга муваффақ бўлган 27-голига айланди.

Бу борада аргентиналик футболчи «Реал Сосьедад» собиқ ўйинчиси Оскар де Паулга тенглашиб олди. Захирадан майдонга тушиб гол уриш борасида биринчи ўрин ҳали-ҳануз «Барселона»нинг собиқ футболчиси Хулио Салинасга тегишли бўлиб қолмоқда, аммо у бор-йўғи битта гол олдинда боряпти — унинг ҳисобида 28 та ана шундай гол бор.

«Бетис» — «Барселона» 2:3

Голлар: 1:0 — Иглесиас (38), 1:1 — Месси (59), 1:2 — автогол Руис (68), 2:2 — Руис (75), 2:3 — Тринкау (87).

«Бетис»: Роблес, Эмерсон, Морено, Манди, Руис, Фекир (Каналес, 83), Акуоку (Родригес, 75), Руибаль (Родри, 65), Гуардадо, Хуанми (Телё, 75), Иглесиас (Морон, 82).

«Барселона»: Тер Штеген, Араухо (Де Йонг, 11), Лангле, Мингеса, Альба, Пуч (Месси, 57), Бускетс (Умтити, 78), Пьянич (Тринкау, 57), Дембеле, Гризманн, Брэйтуэйт (Педри, 46).