«Манчестер Сити» клуби премьер-лигадаги ютуғини нишонлаб улгурмасдан трансферлар тақиқи ва Европа чемпионлар лигасидан четлатилиш хавфи пайдо бўлди.

Чемпионлик ва Лига кубогидаги соврин билан бирга «шаҳарликлар» Англия кубогини ҳам ўз ҳисобига қўшиб олиши мумкин. Улар финалда «Уотфорд» билан тўқнаш келишади.

Бироқ клубга УЕФА ва ФИФА томонидан жиддий чоралар кўрилиши мумкин. Эслатиб ўтамиз, жорий мавсум давомида «Манчестер Сити» УЕФА нинг фейр-плей қоидаларини бузганлиги ҳақидаги маълумотлар чоп этилиб борди.

Охир-оқибат омма ва бошқа клубларнинг босими остида адолат истаб УЕФА катта миқёсдаги суриштирув ишларини бошлади. The New York Times нашрининг маълумотига кўра, икки ҳафта муқаддам тергов иши хулосасини тайёр бўлган. Шу кунларда УЕФА «Сити»ни чемпионлар лигасидан камида бир мавсум четлатишга қарор қилиши мумкин.

«Манчестер Сити» клуби айбдор деб топилган тақдирда Спорт арбитраж судига аппеляция бериш ҳуқуқига эга, шунинг учун ҳам УЕФА ушбу жазонинг 2020/21 йилги мавсумдан бошлаб амал қилинишини кутмоқда.

Премьер-лига чемпионларининг иккинчи катта муаммоси ФИФА билан боғлиқ. Football Leaks интернет порталининг қўлига тушган ҳужжатларга кўра «Манчестер Сити» нафақат молиявий фейр-плей қоидаларига амал қилмаган, балким 18 ёшга тўлмаган футболчилар трансферини ҳам амалга оширган.

Худди шундай вазиятни ушбу мавсум «Челси» клуби мисолида кўришимиз мумкин. Улар икки трансфер мавсумида футболчи сотиб ололмайди.