Европа Чемпионлар лигасида «ПСЖ» майдонида қозонилган ғалаба (2:1) руҳи сақланиб турганини «Манчестер Сити» бугун АПЛнинг 34-турида исботлади. Пойтахтга келган «шаҳарликлар» «Кристал Пэлас»ни таслим этишди.

Агуэро ва Ферран Торреснинг голлари Гвардиола жамоасига ғалаба келтирди. Ўйиндан кейин «Сити»нинг очколари 80 тага етиб бошқалардан янада илдамлаб кетди, «Кристал Пэлас» эса 38 очко билан 13-ўринда.

«МС»га АПЛ ғолиблиги ЕЧЛ финалидан-да яқин қолди. Бунинг учун ҳатто майдонга тушиши ҳам шартмас.

Бунинг учун эртанги ўйинда «Ливерпуль» чемпионлик курашида қатнашаётган «Манчестер Юнайтед»ни сафарда ютса бас. Қизиқ ва аламли вазият: «Сити»нинг ашаддий рақибини курашдан чиқариб юборган тақдирида амалдаги чемпионнинг ўзи чемпионликни қўшқўллаб топшириб юборган бўлади. Аммо ливерпулликлар шунга мажбур — «Ливерпуль» бош мураббийи Юрген Клоппга «Манчестер Юнайтед»га қарши ўйин арафасида берилган биринчи савол:

– «Ливерпуль» «Олд Траффорд»да ғалаба қозониши шартми?

– Шарт. 100 фоиздан кўпроқ. Агар ғалаба қозонмасак еврокубоклар учун имкониятдан қуруқ қоламиз.

Бироқ сўнгги ўйинда ўз майдонида кимсан «Рома»ни 7:1 ҳисобида қақшатган «Манчестер Юнайтед» ҳар қандай қилиб бўлса ҳам «Сити»нинг байрамини кечиктиришга уриниб кўради.

Албатта, буёғини ўйин кўрсатади: эртага соат 20:30 да бошланади.

 АПЛ. 34-тур

«Кристал Пэлас» – «Манчестер Сити» 0:2

Голлар: 0:1 – 57 Агуэро, 0:2 – 59 Ферран Торрес.

«Кристал Пэлас»: Гуаита, Уорд, Митчелл, Дэнн, Ридевалд (Шлупп, 59), Миливоевич, Куяте, Таунсенд (Айю, 82), Эзе, Заа, Бентеке (Матета, 67).

«Манчестер Сити»: Эдерсон, Менди, Жоау Канселу, Лапорт, Аке, Родри, Фернандиньо (Зинченко, 67), Стерлинг, Ферран Торрес, Габриэл Жезус, Агуэро.