31 май куни Мюнхендаги «Аллианц Арена» стадионида бўлиб ўтган УЕФА Чемпионлар Лигаси финалида Пари Сен-Жермен (ПСЖ) жамоаси Италиянинг Интер клубини 5:0 ҳисобида мағлуб этди ва клуб тарихида илк бор ЕЧЛ чемпионига айланди.

Ўйин фаол бошланди ва 12-дақиқада Ашраф Ҳакими Дезире Дуе томонидан узатилган пасни голга айлантирди. 21-дақиқада эса ўша Дуе ўзи ҳам гол уриб, ҳисобни 2:0 га етказди. 64-дақиқада Витиниянинг пасидан кейин Дуе иккинчи бор дарвоза тўрини ишғол қилди. 76-дақиқада эса Ҳвича ҳисобни 4:0 кўринишига келтирган бўлса, 86 Меюлю бешинчи голни киритди.

Бу ғалаба ПСЖ учун нафақат Чемпионлар Лигасидаги биринчи чемпионлик, балки бутун клуб тарихидаги энг ёрқин лаҳзалардан бири бўлди. Аввалроқ, 2020 йилда ПСЖ финалда иштирок этиб, «Бавария»га 1:0 ҳисобида ютқазган эди. Бу сафар эса французлар ўз мақсадларига эришди.

Шунингдек, ПСЖ жорий мавсумда Франция чемпионати (Лига 1), Франция Кубоги ва УЕФА Чемпионлар Лигасини ютган ҳолда треблга эришди.

Шундай қилиб, ПСЖ энди 2025 йилги УЕФА Суперкубоги финалида Европа Лигаси ғолиби бўлган «Тоттенхэм»га қарши майдонга тушади.