«Таълим сифатини назорат қилиш тизимини такомиллаштириш бўйича қўшимча чора-тадбирлар тўғрисида» Президент қарори қабул қилинди. Қарор матни «ЎзА»да эълон қилинди.

Унга кўра, 2019 йил 1 мартдан бошлаб қуйидаги шахсларнинг хорижий давлатларда берилган дипломлари тўғридан-тўғри (махсус синовларсиз) тан олинади ва нострификация қилинади:

• Ўзбекистон ҳудудида алоҳида бўлинмалари (филиаллари) ва қўшма таълим муассасалари фаолият юритаётган хорижий таълим муассасаларида таълим олган Ўзбекистон фуқаролари, чет эл фуқаролари ва фуқаролиги бўлмаган шахсларнинг;
• Quacquarelli Symonds World University Rankings, Times Higher Education, Academic Ranking of World Universities рейтингида TOP-1000 таликка кирган хорижий ОТМларда таълим олганларнинг (илгари TOP-500 эди);
• тасарруфида ОТМлари бўлган Ўзбекистон вазирлик ва идораларининг йўлланмалари асосида мутахассисларни мақсадли тайёрлаш учун хорижий давлатлар томонидан ажратилган квоталар (грантлар) ҳисобидан таълим олган фуқароларнинг;
• 1992 йил 1 январгача хорижий таълим муассасаларига ўқишга кирган фуқароларнинг;
• Олий таълимда сифатни кафолатлаш Европа ассоциациясининг (European Association for Quality Assurance in Higher Education) тўлақонли аъзолари - ваколатли ташкилотлар томонидан аккредитация қилинган таълим муассасаларида таълим олган фуқароларнинг, айрим истиснолар Вазирлар Маҳкамаси томонидан тасдиқланади;
• АҚШ, Австралия, Исроил, Канада, Сингапур, Жанубий Корея, Япония давлатларининг ушбу давлатлар ваколатли ташкилотлари томонидан аккредитация қилинган таълим муассасаларида таълим олган фуқароларнинг, айрим истиснолар Вазирлар Маҳкамаси томонидан тасдиқланади;
• хорижий ОТМларда мутахассисларни мақсадли тайёрлаш учун Ўзбекистоннинг вазирлик ва идоралари томонидан ажратилган маблағлар ҳисобидан таълим олган фуқароларнинг;
• Ўзбекистоннинг халқаро шартномалари, Президент ва Вазирлар Маҳкамасининг қарорларида назарда тутилган бошқа ҳолларда.

Дипломни нострификация қилиш тўғрисидаги аризалар фақатгина Давлат хизматлари марказлари ёки Ягона интерактив давлат хизматлари портали орқали қабул қилинади.