Дунёда коронавирус вакциналари билан боғлиқ эмлаш оқибатида бирорта ўлим ҳолати кузатилмаган. Бу ҳақда Жаҳон соғлиқни сақлаш ташкилотининг расмий вакили Тарик Язаревич маълум қилди, дея ёзмоқда ТАСС.

«Дунё бўйлаб, 9 март ҳолатига, 268 миллиондан ортиқ одам коронавирусга қарши эмланган ва шу пайтгача ушбу вакциналардан вафот этганлар умуман қайд этилмаган», — деди Тарик Язаревич.

Ушбу баёнот Дания, Исландия, Италия ва Норвегиянинг аҳолини «AstraZeneca» вакцинаси билан эмлашни тўхтатганига изоҳ сифатида келтирилган.

«ЖССТ бир нечта мамлакатлар «AstraZeneca» вакцинаси билан эмлашни, уни қабул қилган одамларда қон қуюлиши каби ҳолатлар пайдо бўлиши сабабли, тўхтатганлигидан хабардор. Ушбу қарор фақатгина эҳтиёт чораси сифатида, тўлиқ суриштирув якунига қадар қабул қилинган», — таъкидлади Язаревич.

Унинг айтишича, CОVID-19га қарши эмлаш бошқа сабабларга билан содир бўлувчи ўлим ҳолатларини асло камайтирмайди. «Бошқа сабабларга кўра ўлимлар эмлашдан олдин ҳам бўлган, эмлашдан кейин ҳам давом этаверади, бунинг вакцинага алоқаси йўқ», — деди расмий вакил.